Kazu Falsifika Dokumentu Veteranu, Testemuña sira Hato’o Ona Keixa Ba Komandu PNTL Hasoru Superintendente Asistente Polísia AQ

Testemuña Luciano Timor Maubere. Imajen/Rafa.tl

DILI, RAFA.tl– Testemuña na’in-rua; Luciano Timor Maubere ho Octávio da Conceição hato’o ona keixa ba Komandu Jerál Polísia Nasionál Timor-Leste (PNTL)  hasoru membru Polísia Nasionál Timor-Leste (PNTL) Superintendente Asistente ho inisiál AQ ne’ebé  deskonfia falsifika dokumentu veteranu hodi hetan  grau 8 a 14.

Notísia Relevante: Deskonfia, Superintendente Asistente Polísia AQ Falsifika Dokumentu Veteranu hodi Hetan Grau 8 a 14

“Semana kotuk, ami rua ba duni Komandu Jerál PNTL lori keixa ida kona-bá Superintendente Asistente AQ, liga ho dadus falsifika dokumentu veteranu nian. Prosesu la’o hela ne’ebé ho Octávio da Conceição iha loron rua liubá parte PNTL bolu ona hodi hato’o informasaun, ne’ebé ha’u sei hein bainhira bolu ba hato’o tan konfirmasaun liga ho buat ne’ebé maka ami hato’o,” testemuña Luciano Timor Maubere  informa ba jornalista sira iha Kuartél  Jenerál F-FDTL iha Fatuhada, Dili, Sesta (6/11/2025).

Testemuña ne’e afirma Superintendente Asistente  AQ  ne’e iha Díli laran se mak la koñese, nia uluk iha tinan 1983-1985 nia petinju iha Makasar Indonézia nebá, depois fila mai Dili, se nia envolve tama iha rede klandestina Lospalos ne’e Lospalos oan sira koñese malu.

Nia afirma, dadus ne’ebe iha no lori tutuir, katak nia halo ligasaun ho sira Frente Armada iha ai-laran 1981 ne’e, liuhosi komandante ne’ebé  nia primu, maibé mate tiha ona, iha ninia dadus mós hatete katak, nia servisu hamutuk ho Komandante Aluk Descartes dezde husi 1991 – 1999, ne’e sira konsidera falsifika tanba nia komesa ligasaun ho Frente Armada, depois de atribuisaun Nobel da Paz, signifika tama ona ba iha tinan 1997.

“Nu’udar rekerente ba kontestasaun keixa nian, ami mós tuir dadus  ho buat ne’ebé mak ami iha,” Timor Maubere fó sásin.

Antes ne’e, Porta-voz Interinu Komandu Jerál PNTL, Superintendente Asistente Polísia Mouzinho T. Correia, ba jornalista sira iha edifísiu Ministériu Interiór, Vila-Verde, Díli, Kinta (06/11/2025) hateten, parte Komandu Jerál PNTL hetan ona despaixu hodi notifika testemuña na’in rua hodi kontinua investigasaun ba kazu falsifikasaun dokumentu veteranu nian, ne’ebé deskonfia envolve husi Superintendente Asistente Polísia ho inisiál AQ.

Nia hatutan, Komandu Jerál PNTL sei haruka ekipa husi diresaun servisu informasaun kriminál sei bá iha Lautem atu kompleta investigasaun.

Superintendente Asistente Polísia ne’e subliña, parte komandu Jerál PNTL sei nafatin halo investigasaun kle’an ba kauza ne’e molok aprezenta ba Ministériu Públiku.

Reportajen ekipa Rafa.tl