Kazu Dirijente SNI Hatama Fugetes ho Karreta Estadu Submete Ona Ba Ministériu Públiku

Komandante PNTL Munisípiu Liquiça, Superintendente Polísia Calisto Gonzaga. Imajen/Rafa.tl

DILI, RAFA.tl– Polísia Nasional Timor-Leste (PNTL) Munisípiu Liquiça, Segunda (10/11/2025), submete ona kazu hatama fugetes (sasan kontra bandu) ne’ebé envolve husi dirijente Servisu Nasionál Intelijensia (SNI) nain-rua ho inisiál OCG no AJdRX.

Notísia Relevante: PNTL ho F-FDTL Prende Fugetes Husi Dirijente SNI Na’in-rua

Kazu dirijente SNI na’in-rua nian ne’e rejistu  ho Numéru Úniku Krime (NUK). 0068/25.LIMBR  aprezenta ona ba Ministeriu Públiku (MP) hodi kontinua prosesu legal tuir lei ne’ebé vigora.

Ekipa konjunta husi Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL), Sábadu  (08/11/2025),  prende fugetes hamutuk packs 36 ne’ebé hatama husi dirijente SNI na’in-rua ho inisiál OCG no AJdRX ho karreta Estadu marka Baic ho Sapa Matrikula 05.424 G bainhira sira fila husi Oé-Cusse mai Dili.

Komandante PNTL Munisípiu Liquiça, Superintendente  Polísia Calisto Gonzaga,  hateten kazu  direjente SNI na’in-rua ne’ebé lori  sasan kontra bandu iha karreta Estadu submete ona ba Ministériu Públiku hodi prosesa tuir lei.

“Kazu ne’e ita halo tuir prosesu normal no submete ona ba Ministériu Públiku,” Superintendente  Polísia Calisto Gonzaga, informa hodi responde jornalista sira hafoin  partisipa serimonia lansamentu projetu konstrusaun Kuartél Jerál PNTL iha Caicoli, Dili, Kuarta (12/11/2025).

Superintendente  Polísia Calisto Gonzaga hateten, kazu kontra bandu ne’e ilísitu mézmu liu husi deskamiñu, liu husi dalan estadu nian, maibé la rejistu, portantu liuhosi prosesu normal hatama ona kazu ne’e ba iha Ministériu Públiku (MP).

“Ha’u fiar katak prosesu ne’e la’o, importante prosesu ne’e la’o, ita la taka buat ruma ba públiku. Suspeitu na’in-rua nu’udár dirijente SNI ne’e sala ne’e sala sira tenke responsabiliza iha Lei nia oin,” Calisto Gonzaga hateten.

Fugetes sira ne’ebé dirijente SNI na’in-rua transporta ho karreta Estadu ne’e mak hanesan fugetes shoot 8 hamutuk 24,  shoot 8 hotu maibé ida 0,85, ida seluk 1,96 ne’ebé hamutuk lolon 90-resin. Dirijente SNI na’in-rua ne’e sosa partikular fugetes sira-ne’e iha Atambua-Indonézia bainhira sira halo viajen husi Oé-Cusse atu mai Dili liuhosi Atambua-Indonézia.

Forsa konjunta PNTL ho FALINTIL-Forsa Defeza Timor-Leste (F-FDTL) halo operasaun iha Aldeia Ediri, Suku Vatuvou, Postu Administrativu Maubara, Munisípiu Liquiça, konsege deteta no halo apreensaun ba sasan kontra bandu ne’ebé SNI na’in-rua ne’e hatama mai Timor-Leste.

Reportajen Ekipa Rafa.tl