Kazu Abuzu Seksuál Koletivu, Polísia Husu Mandadu Detensaun MP Ba Suspeitu Na’in-Haat

Polísia halo ona identifikasaun ba suspeitu na'in-haat ne'ebé envolve iha kazu abuzu seksuál koletivu ne'ebé viral iha média sosiál. Imajen/PNTL

DILI, RAFA.tl – Polísia Nasionál Timor-Leste (PNTL) Munisípiu Díli husu Ministériu Públiku (MP) hasai mandate detensaun ba suspeitu na’in-haat ne’ebé envolve iha kazu abuzu seksuál koletiva ne’ebé viral iha média sosiál.

Komandante Polísia Munisípiu Díli, Superintendente Xefe Polísia Orlando Gomes hatete, Komandu Polísia Munisípiu Díli foti ona medida asegura suspeitu  sira hamutuk ho vítima hodi halo identifikasaun, no kazu ne’e Polísia aprezenta ona ba Ministériu Públiku (MP) hodi husu karta dandadu detensaun.

Komandante PNTL Munisípiu Díli, Superintendente Xefe Polísia Orlando Gomes ba jornalista sira iha konferénsia imprensa ne’ebé hala’o iha Eskuadra Polísia Dom Aleixo, Díli, Kuarta (21/01/2026),  haktuir Komandu Polísia Munisípiu Díli halo ona identifikasaun ba suspeitu sira ne’ebé halo abuzu seksuál koletivu  ho naran inisiál mak hanesan JMPA, JGFPS, GAP, no JPR. Tanba ne’e, PNTL  husu karta mandadu detensaun husi MP hodi halo kapturasaun ba suspeitu sira tuir lei.

“Violasaun seksuál ne’ebé mak virál iha mídia sosiál, ne’ebé akontese iha loron 05 fulan-Novembru tinan 2025, foin mak virál, entaun  Polísia foti medida, atu nune’e, lori vítima mai presta deklarasaun no mós foti suspeitu na’in-haat mai halo identifikasaun. Tanba kazu ne’e kleur, ne’ebé kazu ne’e aprezenta ona ba Ministériu Públiku hodi husu mandadu detensaun,” Superintendente Xefe Polísia Orlando Gomes hateten.

Komandu Polísia Díli bolu ona vítima hodi presta deklarasaun ne’ebé hein prosesu Ministériu Públiku atu foti prosesu hasoru suspeitu sira.

Tuir deklarasaun vítima nian katak, iha momentu ne’ebá vítima  ba partisipa ai-funan ida iha parte Becora, hafoin kolega sira lori vítima ba iha Aituri-Laran, Taibesi, hodi hetan esplorasaun seksuál koletivu ne’e.

“Tuir deklarasaun vítima nian katak, iha momentu vítima sai husi Aimutin atu ba hadér mate-uma ida iha área STM Becora, maibé to’o iha ne’ebá la kleur nia kolega bolu ba halimar  iha Aituri-Laran,  depois mak suspeitu na’in haat ne’e mosu ba lori kedas ho tua sabu balun ho serveja ABC ho vítima sira hemu, depois vítima hamlaha, fó osan ba nia kolega sosa hahán, maibé kalan-boot ona la sosa, depois iha fali  loron 05 fulan-Novembru dadér 2025, nia kolega ba sosa hahán ne’e mak suspeitu na’in-haat halo violasaun seksuál ba vitíma,” Komandante Polísia ne’e haktuir.

Superintendente Xefe Polísia Orlando Gomes hatete, Polísia hahú buka tuir Id Fecebook  ne’ebé  publika video abuzu sekuál  koletivu hasoru vitíma ne’e iha mídia sosiál, tanba ne’e husu sidadaun hotu atu labele fahe tutan vídeo sira ne’e no presija respeita ema nia integridade pesoál.

Reportajen ekipa Rafa.tl