Kasuka F.C Manán Mihis Karketu Dili F.C Ho Score 2–1 iha AFC Challenge League 2026/2027

Imajen/Repro.Espesiál

Díli, 16 Setembru 2026 (RAFA) –  Kasuka F.C husi Brunei Darussalam manán reprezentante Timor-Leste Karketu Dili F.C, ho score mihis 2–1 iha faze preliminár AFC Challenge League 2026/2027.

Jogu entre klubu rua hala’o iha Estádiu Nasionál Hassanal Bolkiah, Brunei Darussalam, Tersa ne’e, iha inísiu partida, ekipa rua hatudu ritmu jogu ne’ebé di’ak no ambisaun atu buka golu. Maibé, Kasuka F.C konsege kolekta golu dahuluk, iha minutu 13 liuhosi Jordan Souza Coelho, hodi lori ekipa uma-na’in lidera 1–0.

Karketu Dili F.C hetan oportunidade di’ak atu halo empate score iha minutu 30, hafoin guarda-redes Kasuka, hamonu Olagar Malik iha área penalti. Árbitru fó penalti ba Karketu, maibé jogador Italo Pimental la konsege aproveita oportunidade ne’e.

Ekipa uma-na’in aumenta tan vantajen iha minutu 35, hodi muda score sai 2-0, liuhosi jogador Samuel Abbey. Score ne’e mós mantein to’o jogu primeira parte ramata.

Tama ba segunda parte, Karketu Dili F.C hasae  intensidade jogu, no buka atu hamihis sira nia derrota. Esforsu ne’e fó rezultadu iha minutu 69, bainhira jogador James Arthur konsege kolekta golu hodi muda skor sai 2–1.

Ho golu ne’e halo jogu sai tense ass liu-tan iha minutu-minutu ikus. Karketu buka oportunidade liuhosi nia kontra atake ne’ebe lalais hodi buka empata. Maibe, ekipa reprezentante husi Bruney Darusalam konsege mantein rezultadu to’o jogu segundu parte ramata.

Ho derrota ne’e, Karketu Dili FC la konsege avansa iha faze grupu AFC Challenge League 2026/2027. Enkuantu Kasuka FC asegura vaga ba faze grupu kompetisaun kontinentál ne’e.

Jornalista: Marito da Costa