Karketu Sei Kontribui Rezultadu Di’ak iha AFC Chalange League 2026

Karketu Dili F.C hasoru malu ho MJDAC, Kinta 03 Setembru 2026.

Díli, 03 Setembru 2026 (RAFA) – Ministru Juventude Desportu Arte no Kultura (MJDAC), Nelio Isaac Sarmento, otimista ba klubu Karketu Dili F.C bele lori rezultadu dia’k bainhira partisipa iha jogu ASEAN Chalange League 2026 iha Brunei.

Ministru Juventude Desportu Arte no Kultura Nelio Isaac Sarmento konsidera ekipa Karketu hanesan klubu organizadu  futebol ida iha Timor-Leste. Ne’e duni, klubu sira ne’ebé ba partisipa la’ós de’it atu buka rezultadu iha kompetisaun. Maibe, fó oportunidade ba jogadór sira partisipa iha kompetisaun internasionál hodi manán esperiénsia no aprende buat foun aplika iha rai laran.

“Ha’u espera ho klubu ne’ebé organiza diak hanesan ne’e, bele  hetan rezultadus di’ak,” Ministru Nelio Isaac Sarmentu hateten ba Jornalista sira, hafoin ramata vizita husi ekipa Karketu iha nia kana’ar fatin, Kinta-ne’e.

Ministru ne’e afirma, governu liuhosi ministeriu  iha knaar oinsá atu fasilita kondisaun ba klubu sira ne’ebé merese hakarak hetan apoiu, maske la boot hanesan entidade hotu-hotu hakarak. Maibe, sempre fasilita hodi hakman todan ne’ebe klubu iha.

Nia mós enkoraja ba klubu sira nafatin fó oportunidades ba jogadór atu halo kompetisaun, nune’e nia kontinua aprende ba oin bele sai jogadór ne’ebe kualidade.

“Buat ne’ebe ita haré iha ne’ebá fila mai ita organiza ita nia klubu, organiza ita nia atividade  liga, hodi ita bele hetan  jogadór iha oin mai hodi defende ita nia rai,” Ministru Nelio Isaac afirma.

Prezidente Karketu Dili FC, Luis Oliveira agradese ba MJDAC fó ona apoiu hodi haforsa Karketu iha kompetisaun ASEAN Chalange League 2026.

“Ami mai vizita  ba Ministru MJDAC  hodi halo despedida , tantu agradesementu boot  ba governu ne’ebé mak apoiu mós  klubu  iha parte balu,” nia subliña.

Luis Oliveira husu apoiu Governu no povu tomak atu fo orasaun  hodi nune’e Karketu bele halo  istoria manan iha jogu ne’ebe sira sei partisipa.

Garante  Halakon Kasuka 

Treinadór Karketu Dili F.C, Simon Elissetche, garante nia ekipa sei halakon Kasuka Iha kompetisaun Asean  Futebol Confederasaun (AFC) Challenge League 2026.

Karketu Dili F.C  ne’ebé reprezenta Timor-Leste sei hasoru malu Kasuka husi  Brunei Darussalam iha loron 08 fulan-Setembru-ne’e iha estadiu Sultan Hasanal Bolkiah.

Simon Elissetche, hatudu konfiansa boot ba preparasaun ekipa nian atu hasoru Kasuka no optimista katak Karketu iha kapasidade atu hetan rezultadu di’ak no luta ba vitória iha jogu ne’e.

“Ami preparadu ba jogu hasoru ekipa husi Brunei. Ami otimista no tenke manan,” Simon Elissetche informa ba jornalista sira.

Treinadór ne’e dehan, bazeia ba observasaun durante sesaun treinamentu, jogadór sira hatudu mentalidade di’ak no prontidaun atu kompete iha nivel internasionál.

Karketu Dili FC sei halo viajen ba Brunei Darussalam iha  Sesta , 04 Setembru-ne’e  hodi prepara an ba enfrenta Kasuka F.C iha AFC Challenge League 2026.

Tuir lista jogadór Karketu Dili F.C ne’ebé  partisipa iha kompetisaun ne’e mak hanesan, Tristan (GK), Nates (GK), Brito (GK), Thawan, Ason, Anizo, Eky, Braz, Pepe, Daniel Gayo, Anis, Olegar Malik Xavier, Palomito, Tiago, Dompson, Freteliano, Fabio Christian, Italo Pimental, Luis Figo, Nono, Angenuku no James.

Jornalista: Marito da Costa