Karketu Díli F.C Rekolla Pontu Tolu Hafoin Manan Nia Adversáriu Coração F.C ho Score 1-0

Karketu Díli F.C manan nia adversáriu Coração F.C ho score 1-0. Imajen/LFTL

Díli 15 Juñu 2026 (RAFA.TL)– Karketu Díli F.C susesu rekolla pontu tolu iha jogu daruak Liga Timorense époka 2026 hafoin manan nia adversáriu Coração F.C ho score 1-0 liu husi golu uniku ne’ebé marka husi jogadór  Daniel Asino.

Iha jogu kontinuasaun primeira divizaun ne’ebé hala’o iha estádiu Munisipál Díli, Domingu (14/06/2026), ekipa Karketu hahú sira-nia jogu ho tensi aas no halo kedas presaun maka’ás ba liña defeza Coração liuhusi bola aas, enkuantu Coração F.C aproveita failansu hosi Karketu Díli F.C hodi halo kontra atake lalais.

Karketu Díli F.C hetan oportunidade di’ak dahuluk iha minutu 29 liuhusi bola falta ne’ebé ezekuta husi jogadór Zenivio Mota no konsege kabesa husi jogadór  Risky  Kurniawan, maibé bola kabesada ne’e liu deit husi besi-rin leten.

Karketu Díli F.C hetan oportunidade daruak iha minutu 34, nafatin liu husi bola falta ne’ebé jogadór Zenivio Mota suta kona deit iha baliza nia riin no ekipa Karketu Díli F.C kontinua halo presaun ba adversáriu to’o jogu primeira parte termina.

Tama ba segunda parte, ekipa Karketu Díli F.C ne’ebé lidera husi treinadór estranjeiru Bernard Teye kontinua halo esforsu no mudansa ba tátika nune’e tama ba minutu 57 marka golu ida liu husi jogadór Daniel Asio.

Golu ne’e akontese  hafoin servisu hamutuk husi jogadór Alexandre Corsinho, ne’ebé simu bola husi Angenuco Viegas hodi halo individu ho di’ak iha área penalidade adversáriu, no pasa ba jogadór Daniel Asino no konsege finaliza ho di’ak hodi muda score ba 1-0.

Hafoin golu ne’e ekipa Coração F.C mós tenta halo kontra atake maka’ás ba liña defensivu adversáriu ho intensaun hakarak halo empata

Jogadór  Coração F.C, Ofri Halitopo hetan duni oportunbidade ida atu marka golu, maibé baliza Karketu Díli F.C sei bele antesipa ho dia’k hodi mantein score 1-0 to’o jogu termina.

Ho vitória ne´e, Karketu Díli F.C rekolla pontu neen husi jogu rua ne’ebé manan hotu.  Alende ne’e, Coração F.C mantein iha zona mean tabela klasifikasaun hafoin iha jogu rua ne’e sofre hotu derrota.

Jornalista: Marito da Costa/Editór: Vito Salvadór