Karketu Dili F.C Kontrata Jogadór Na’in-Ualu no Treinadór Simón Pablo Eleseche Ba Jogu ACL 2

Karketu Dili F.C hahú halo preparasaun atu enfrenta Kasuka F.C husi Brunei Darussalam iha jogu play-off Asian Champions League Two, 08 Setembru 2026. Imajen/espesiál

Díli, 18 Agostu 2026 (RAFA)- Karketu Dili F.C hahú halo preparasaun másimu no halo mós kontratu ho jogadór na’in-ualu, inklui treinadór ho nasionalidade Repúblika Xile Simón Pablo Eleseche, hodi enfrenta jogu play-off Asian Champions League Two (ACL 2) ba époka ida-ne´e.

Jogadór foun ni’an-ualu ne’ebé Karketu Díli F.C kontratu mak hanesan Luis Figo Pereira Ribeiro, Alexander Oscar Lima Quintão, Palamito Antinio Caffin Ribeiro, Aniju Correia, Olegar Fernando Malik Xavier, Italo Soares Pimemtel, Tahwan Marcos Dompson Sekyere.

Prezidente Karketu Dili F.C, Luis de Oliveira ba RAFA, iha nia servisu fatin, Bemori, Segunda-ne´e informa ekipa Karketu fó konfiansa fila-fali ba nia eis-treinadór Simón Pablo Eleseche, atu lidera hikas ekipa iha faze play-off Asian Champions League Two no kontratu mós jogadór sira ne’ebé hetan rekomendasaun direita husi treinadór.

“Ami halo kontratu ho  jogadór husi klubu sira seluk hanesan SLB, Santo António no Santa Cruz ami enkaisa hamutuk hodi ami halo perpasaun atu aranka no  haforsa tan Karketu,” Luis de Oliveira hateten.

Prezidente Klubu ne’e haktuir, Simón la’ós ema foun ba Karketu Dili F.C. tanba klubu ho treinador ne’e servisu hamutuk ona liu tinan 10, agora, Karketu Dili F.C deside atu hamutuk fali ho Simón, ho objetivu atu haré no avalia rezultadu ne’ebé bele hetan iha kompetisaun tuirmai.

“Ekipa ne’e hateke ba oin, ba ho fiar aan, ami ba la’ós reprezenta klubu, maske naran tau Karketu Dili maibé ami reprezenta Timor-Leste iha kompetisaun Asian Champions League Two,” nia afirma.

Tuir orariu ba jogu play-off Asian Champions League Two, Karketu Dili F.C sei hasoru Kasuka F.C husi Brunei Darussalam, iha loron 08 fulan-Setembru, tinan ne’e.

Karketu sei hala’o preparasaun iha rai laran to’o loron 5 fulan-Setembru no planeia to’o iha Brunei iha loron 06 fulan-Setembru, atu fó tempu sufisiente ba ekipa atu deskansa no prepara-an molok enfrenta Kasuka F.C.

Jornalista: Davilio Valdamir