Karketu Díli F.C iha Ambisaun Hametin Títulu Kampiaun iha Taça da Liga

Treinadór Karketu Díli F.C, Bernard Taye ho nia kapitaun ekipa garante halakon nia adversáriu Santa Cruz F.C iha jogu Taça da Liga, Domingu, 08 Fevereiru 2026. Imajen/Rafa.tl

DILI, RAFA.tl– Karketu Díli F.C iha ambisaun boot hametin títulu kampiaun iha Taça da Liga époka ne’e. Nune’e, ekipa Matak Malirin ne’e  promete ba nia adeptus sira atu halakon nia adversáriu Santa Cruz F.C iha jogu ikus grupu D iha estádiu Munisipál Díli, Domingu (08/02/2026).

Notísia Relevante: Karketu Díli F.C Lidera Provizóriu Tabela Klasifikasaun Grupu D Hafoin Halakon As Marca ho Skor 3-1

Treinadór Karketu Díli F.C, Bernard Taye  liu husi konferénsia ba imprensa iha Estádiu Munisipál Díli, Kuarta (04/02/2026), afirma nia Karketu Díli FC praparadu hodi hala’o jogu no iha esperansa  manan ho golu barak liután hasoru Santa Cruz F.C.

Make iha jogu mintu 90 nia laran mak sei determina,  mas Karketu Díli FC fiar aan rekolla vitória  tanba  sira-nia preparasaun sira másimu durante ne’e.

“Ami nia ekipa preparadu tebes, ha’u observa jogu husi Santa Cruz kontra As Marca ne’ebé sira hatudu jogu di’ak no diferente husi kada ekipa sira ne’e. Ha’u prepara dalan ne’ebé maka di’ak liután ho ha’u nia jogadór sira, hatudu jogu iha kada momentu diferente, ami sei halo jogu ne’ebé furak liu no asegura katak sei marka golu barak liután,” Bernard Taye hateten.

Treinadór Karketu Díli F.C ne’e mós  agradese ba Prezidente FFTL ho estrutura tomak, tanba iha hanoin ne’ebé di’ak hodi hamoris fali talentu jogadór Timor-Leste nian inklui desportu iha rai laran liu husi Taça da Liga 2025.

Iha fatin hanesan, treinadór Santa Cruz F.C, Miguel Santos Soares afirma,  nia ekipa mós preparadu, maibé  nia parte konsidera sira nia partisipasaun iha Taça da Liga ne’e hanesan sasukat ba sira hodi prepara aan ba primeira divizaun époka ne’e.

“Hanesan iha inísiu ha’u dehan ona, sorti ida mai ami iha segunda divizaun  ne’ebé mak hakat ba primeira divizaun, hasoru kedas ekipa zigante rua iha primeira divizaun hanesan As Marca ho Karketu, ita hatene Karketu sai kampiaun ba liga,” Miguel Santos Soares hateten.

“Hanesan ha’u dehan, ami prepara loron lima hodi hasoru Karketu, ami prepara ho di’ak hodi bele hasoru Karketu iha Domingu agora. Mai ami ita hasoru ekipa boot ita tenke prepara di’ak liu tan, maibé ida ne’e mos másimu ona  hodi sai sasukat ba ami bainhira ami joga iha liga mai agora. Ami hasoru uluk Karketu hanesan ekipa ne’ebé mak boot, atu ami lakon ga, manán ga, impata, ne’e la importante mai ami, ami atu hadi’a hodi prepara ba primeira divizaun mai agora,” nia tenik.

Reportajen ekipa Rafa.tl