Karketu Díli F.C Hakat Ba Finál Taça da Liga Hafoin Halakon Assalam F.C ho Skor 3-2

Jogadór sira Karketu Díli F.C selebra vitória hafoin halakon Assalam F.C ho skor 3-2 iha Estádiu Munisipál Díli, Segunda (23/02/2026). Imajen/Rafa.tl

DILI,RAFA.tl– Karketu Díli F.C susesu hakat ba finál hafoin iha jogu kontinuasaun Taça da Liga halakon nia adversáriu Assalam F.C ho skor 3-2.

Notísia Relevante: Udan Boot Obriga Jogu Karketu Díli F.C Vs Assalam F.C Adia

Karketu Díli F.C no Assalam F.C tenke halo jogu kontinuasaun hahú husi minutu 34, tanba antes ne’e, Domingu (22/02/2026), ekipa rua labele kontinua jogu ho razaun kondisaun klima, udan ho intensidade forte halo bee nalihun iha Estádiu Munisipál Díli.

Iha jogu kontinuasaun ne’ebé hala’o iha Estádiu Munisipál Díli, Segunda (23/02/2026), ekipa rua mantein ho kompozisaun jogadór ne’ebé iha, tanba antes ne’e empata hela ho skor 1-1.

Ekipa Karketu Díli F.C ne’ebé ho naran Estimadu Matak Malirin hahú kedas halo jogu ida atrativu ho atake maka’as ba adversáriu Assalam F.C hodi buka meius atu aumenta golu.

Tama ba minutu 35 jogadór Karketu Díli F.C, Ola Olipio marka kedas golu ida hodi muda skor ba 2-1.

Assalam F.C  halo mudansa ba estratéjia hodi buka mós oportunidade atu halo balansu ba jogu, maibé to’o primeira parte termina ekipa Karketu Díli F.C kontinua lidera iha tabela skor.

Tama ba segunda parte, Karketu Díli F.C kontinua halo atake barak no Assalam F.C mós mantein disiplina iha liña kotuk no hein oportunidade hodi halo kontra atake liu husi bola aas no aproveita bola falta ne’ebé adversáriu komete.

Tama ba Minutu 75 jogadór Karketu Díli F.C Ola Olipiu marka tan golu daruak hodi muda skor ba 3-1. Maske nune’e, Assalam F.C kontinua halo esforsu no ikus mai jogadór Martinho Lopes konsege marka golu ida hodi hamihis derota ne’ebé Assalam F.C sofre 3-2.

Ho vitória ne’e, ekipa Matak Malirin alias Karketu Díli F.C sei hasoru nia adversáriu Emmanuel F.C iha jogu finál Taça da Liga FFTL.

Hafoin jogu remata, Treinadór Karketu Díli F.C,  Bernard Teye, agradese  ba ekipa Assalam ne’ebé hatudu jogu di’ak no disiplina, aleinde ne’e Bernard mos iha esperansa Karketu mak sei sai kampiaun ba Taça da liga.

“Ami agradese ba sira,  ida-ne’e jogu ida ne’ebé di’ak, no ida-ne’e maka futeból ida ne’ebé di’ak, ami hatete ona ba sira antes, katak  ami preparadu, ami aprende ona hosi ami nia sala sira antes, entaun ami mai atu hatudu futeból ida ne’ebe di’ak ba sira, no ha’u promete ba sira katak ami sei manán, entaun  rezultadu hatudu. Ha’u mai ho objetivu ida, objetivu mak hakarak sai kampiaun iha Taça da Liga ne’em,” Bernard Taye hateten.

Kapitaun ekipa Karketu Díli F.C, Olegar Malik Xavier “Kaka” afirma, iha jogu ne’e Karketu  iha mós fallansu balu ne’ebé halo husi guarda rede ho jogadór sira, nune’e rezulta ekipa adversáriu konsege koleta golu.

Nia parte iha esperansa hadi’a erru hirak ne’e, nune’e bele hatudu jogu di’ak iha faze finál no sai kampiaun.

“Ami nia fallansu iha, ami nia baliza laiha komunikasaun di’ak ho defeza sira, tanba ne’e mak  golu ne’ebé mak sira halo ba ami ne’e, mais fásil liu, maibé ba oin ami sei hadi’a, finál ne’e ami sei hatudu jogu di’ak, no ami hakarak duni hetan kampiaun iha Taça ne’e”. Hatete Olegar Malik Xavier.

Ekipa Assalam F.C rezeita fó komentáriu ba mídia relasiona ho rezultadu jogu ne’ebé sira iha.

Tuir oráriu jogu finál Taça da Liga FFTL, Karketu Díli F.C ho Emmanuel F.C sei hala’o iha Sábadu,  28  fulan-Fevereiru ne’e, iha Estádiu Munisipál Díli, tuku 19:00 OTL.

 Reportajen ekipa Rafa.tl