Karketu Díli F.C Derrota iha Jogu Ikus Kontra DIT F.C ho Score 0-1

Karketu Díli F.C vs DIT F.C. Imajen/LFTL

Díli,  21 Jullu 2026 (RAFA.TL)- Ekipa Karketu Díli F.C sofre derrota ho score 0-1 iha jogu ikus Liga Timorense primeira divizaun époka 2026 kontra adversáriu DIT F.C, iha estádiu Munisipál Díli, Tersa-ne’e.

Ekipa Karketu Díli F.C no DIT F.C hahú jogu ho kalma no ekipa rua la halo atake ba malu atu hadau malu oportunidade tanba iha tabela klasifikasaun ekipa rua iha pozisaun ida livre husi degradasaun no laiha ona oportunidade atu hadau titúlu kampiaun iha époka ne’e.

Iha jornada da-sia ne’e ekipa Karketu Díli F.C hatun mós nia jogadór suplente sira hamutuk ho jogadór intimu sira atu fó oportunidade ba jogadór hotu hetan minutu iha jogu ikus, enkuantu ekipa DIT F.C mantein ho jogadór intimu sira.

Ho kombinasaun sira ne’ebé iha, DIT F.C hetan uluk oportunidade halo atake ba adversáriu Karketu Díli F.C liuhusi jogadór estranjeru Tanimola Ayobami ho nia sutu maka’ás ba guarda rede Karketu iha área penalidade hafoin simu bola husi  Eufrazio Lopes, maibe oportunidade ne’e sei bele defende husi guarda rede Karketu Expedito Fereira.

Hafoin hetan ameasa,  Karketu Díli F.C mós lakohi lakon oportunidade no tama ba iha minutu 15 ekipa Matak Malirin konsege halo ameasa ida liuhusi Jogadór Daniel Asino ho nia individu lori tama bola ba grade área adversáriu hodi husik lansa sutu ida, maibé sei bele defende husi guarda rede DIT F.C Djingue Mossi.

Ekipa rua mantein ho ritmu jogu ne’ebé iha to’o ba intervallu ekipa rua mantein ho score 0-0.

Tama ba segunda parte, Ekipa DIT F.C kontinua hasa’e nia ritmu no lansa atake ba ekipa Karketu Díli F.C. Iha minutu 59 jogadór DIT F.C , Elvis da Silva marka golu ida no lori nia ekipa lidera uluk ho score 1-0.

Hafoin golu ne’e, ekipa Karketu Díli F.C hahú halo mudansa ba tátika no halo mós substituisaun ba liña jogadór hodi buka halo balansu, maibé ekipa DIT F.C mantein halo jogu ida ho disiplina hodi asegura vitóri ne´ebé iha.

Tama ba minutu ikus jogu atu termina, ekipa Karketu Díli F.C  lansa kontra atake maka’ás liután no hetan oportunidade di’ak liuhusi jogadór Daniel Asino iha grande área DIT F.C no halo suta direta ba baliza adversáriu, maibé bola sei kona besi-riin.

Hafoin ameasa ne’e, DIT F.C mós lansa kedas ameasa ida liu husi kontra atake lais iha minutu ikus, maibé sei falla no too jogu termina ekipa DIT mantein lidera ho score 1-0.

Ho rezultadu ne’e, DIT F.C sa’e ba pozisaun da-haat tabela klasifikasaun ho pontu 12, enkuantu Karketu Díli F.C mantein iha pozisaun datoluk ho pontu 17.

Jornalista : Marito da Costa/Editór: Vito Salvadór