Kanadá Asegura Fatin Ida iha Jornada 16 Hafoin Halakon Áfrika-Súl 1-0

Jogu Kanadá vs Áfrika Súl. Imajen/REUTERS

Díli, 29 Juñu 2026 (RAFA.TL)- Selesaun kanadianu asegura fatin ida iha jogu 16 Tasa Mundiál 2026 nian hafoin halakon Áfrika-Súl ho score 1-0 iha jogu elimainatóriu ne’ebé halao iha estádiu Los Angeles, EUA, Segunda (29/06/2026).

Kanadá asegura fatin ida iha faze 16 ne’e liu husi golu dramátiku jogadór Stephen Eustaquio iha segunda parte.

Desde inisiu, Kanadá domina jogu, hodi foti inisiativa iha atake. Oportunidade dahuluk mosu iha minutu neen, enkuantu kabesa ida hosi Derek Cornelius hosi set-piece iha minutu 22 salva hosi Williams.

Áfrika-Súl hili halo jogu ho ritmu ida ne’ebé lentu, hodi depende ba kontra-atake lalais sira. Defeza adversáriu ne’ebé sólidu halo susar ba Kanadá atu kria oportunidade sira ne’ebé klaru, hodi rezulta iha markadór ne’ebé laiha golu iha intervalu.

Tama ba iha segunda parte, Áfrika-Súl hahú ataka ho aten-barani liután; Oswin Appollis ameasa ho suta ida ho distánsia dook iha minutu 64, maibé bola ne’e la’o dook de’it hosi alvu.

Treinadór Jesse Marsch lori Alphonso Davies iha minutu 75 hodi hametin atake. Kapitaun nia prezensa anima jogu ofensivu Kanadá nian, no Jonathan David besik atu marka golu iha minutu 79, maibé hetan salvasaun brillante hosi baliza adversáriu Afrika-Sul Williams.

Tama ba minutu 90+2 jogadór Stephen Eustaquio marka golu úniku ba nia adversáriu hodi lori vitóri ba nia ekipa no hakotu kampaña Áfrika-Súl nian iha jogu eliminatória dahuluk Tasa Mundiál 2026 nian.

Iha ronda 16, Kanadá sei hasoru manan-na’in hosi jogu entre Olanda no Maroko.

NTV/ETO Telco mak iha direitu ofisiál  tranzmisaun eskluzivu ba Kopa Mundial 2026 iha Timor-Leste.

Jornalista: David Gonçalves/Editór: Vito Salvadór