Kablaki F.C Hakat Quartu Finais Kopa AFTL Hafoin Manan Crazy Horse ho Score 4-3

Kablaki F.C susesu hakat ba faze eliminasaun Quartu Finais Kopa Asosiasaun Futsal Timor-Leste (AFTL) hafoin manan nia ekipa adversáriu Crazy Horse ho score dramatiku 4-3 iha jogu ikus faze apuramntu grupu A. Imajen/AFTL

Díli, 4 Juñu 2026 (RAFA.TL)- Kablaki F.C susesu hakat ba faze eliminasaun Quartu Finais Kopa Asosiasaun Futsal Timor-Leste (AFTL) hafoin manan nia ekipa adversáriu Crazy Horse ho score dramatiku 4-3 iha jogu ikus faze apuramntu grupu A.

Jogu ne’ebé hala’o iha kampu futsal Kuartel Jenerál FALINTIL-Forsa Defeza de Timor Leste (F-FDTL) iha Díli, Kuarta (03/06/2026), hahú kedas  inisiu jogu ekipa rua hatudu jogu ne’ebé furak  no atrativu iha kampu hodi atrai adeptu sira hadomi futsal sira ne’ebé mak asiste direta  jogu refere.

Ekipa Crazy Horse ne’ebé hatudu ritmu jogu di’ak konsege domina liu bola no tama ba iha minutu 15 konsege lidera uluk ho score 1-0 liu hosi auto golu hosi jogador Gaudencio da Costa.

Ekipa Kablaki F.C hahú lakon sira nia ritmu jogu, ho nune’e, liu de’it minutu ida Crazy Horse F.C aproveita hodi aumenta tan golu ida hodi haboot tan score ba 2-0 liu hosi asaun Jefanio Sarmento.

Ho score refere la muda ritmu jogu ekipa Crazy Horse F.C,  to’o  tama ba iha minutu 18 Crazy Horse haboot liután  sira-nia score sai 3-0 liu hosi jogadór Romario Benevides.

Ekipa Kablaki F.C foin responde golu ida liu hosi asaun jogadór Gaudencio da Costa hodi hamihis score sai 3-1 iha minutu 19 no score refere mos mantein to’o termina jogu priemeira parte.

Kontinua ba jogu segunda parte, ekipa Kablaki F.C komesa halo mudansa ba tátika hodi domina liu bola, nune’e iha minutu 26 liu hosi jogadór Ronaldinho hodi hamihis score sai 3-2.

Jogu sai manas liután ba ekipa rua ne’e hodi lansa kontra atake ba malu no tama ba iha minutu 38 Kablaki F.C konsege halo empata ba score sai 3-3 liu hosi asaun Jose Cortereal.

Tama ba iha minutu 39 antes atu termina jogu Segunda parte, Zefrino dos Santos konsege produs golu ida hodi lori nia ekipa lidera hikas ho score 4-3 to’o termina jogu Segunda parte.

Hosi rezulatadu vitória ne’e lori ekipa Kablaki F.C hakat ba faze eliminasaun Quartu Finais Kopa AFTL 2026 ho pontu haat  hanesan ho ekipa Gamer F.C, maibe diferente iha produtividade golu.

Ekipa Iha grupu A hamutuk tolu, kompostu hanesan Kablaki F.C Gamer F.C no Crazy Horse no hosi ekipa tolu ne’e ekipa Kablaki F.C mak hakat ba faze eliminasaun Quartu Finais enkuantu ekipa rua obrigado tenke Elimina hosi faze apuramntu grupu.

Jornalista: Davilio Valdamir/Editór: Vito Salvadór