Jogadór Liga Timorense Reforsa Kompetiaun Copa Avó Nana

Prezidente Komisaun Organizadora Copa Avó Nana, Feliciano Ximenes.

Díli, 24 Agostu 2026 (RAFA) – Komisaun Organizadora Copa Avó Nana 2026 fó oportunidade ba jogadór sira husi liga Timorense  reforsa klubu 25 ne’ebé sei kompete kompetisaun ne’e.

Prezidente Komisaun Organizadora Copa Avó Nana, Feliciano Ximenes informa prezensa jogador Liga Timorense sei sai motivasaun no oportunidade importante atu fahe esperiénsia ba jogador foun sira, liuliu kona-ba oinsá atu hatudu performa di’ak durante jogu.

“Ita presiza mós utiliza jogador Liga, na’in-tolu de’it. Tanba sira iha esperiénsia barak, sira bele fahe esperiénsia durante treinamentu no jogu iha kampu, hodi motiva jogador sira seluk, liuliu iha fornese bola, hasai bola no supply bola ba jogador avansadu sira hodi hatama golu ba adversáriu,” Feliciano Ximenes  informa ba jornalista sira iha Díli, Domingu-ne’e.

Nia esplika jogador Liga Timorense ne’ebé sei involve iha kompetisaun ne’e, nain ne’en, tolu joga no tolu suplente.

Nia hatutan, Komisaun Organizadora Copa Avó Nana 2026 prepara ona osamentu ba ekipa sira ne’ebé sei okupa pozisaun primeiru to’o kuartu lugar.

“Agora daudaun ami prepara premiu hanesan tinan kotuk. Primeiru lugar sei hetan US$15,000.00, segundu lugar US$8,000.00, terseiru lugar US$5,000.00, no kuartu lugar US$2,500.00,” Feliciano hateten.

Aliende premiu ba primeiru, segundu, terseiru no kuartu lugar, Komisaun Organizadora hamutuk ho patrosinadór sira sei prepara mós premiu individual ba jogador ne’ebé hatudu performa di’ak liu durante kompetisaun.

Ba kategoria mellor markadór, sei iha premiu motór ida. Mellor Guarda-Rede hetan motór ida, inklui mellor jogador sei hetan motór ida.

Ba treinadór, Komisaun Organizadora sei fó atensaun ba treinadór sira ne’ebé iha estratéjia no planu di’ak hodi lori sira-nia klubu to’o sai kampiaun Copa Avó Nana 2026.

Jornalista: Marito da Costa