Japaun Apoiu Timor-Leste iha Programa Bolsa Estudu JDS Millaun ¥176

Ministru Bendito Freitas ho embaixadór Japaun mai Timor-Leste, Yamamoto, asina akordu subvensaun ba projetu Bolsa Estudu ba Dezenvolvimentu Rekursu Umanu (JDS)  ho motante millaun 176 USD, Sesta 21 Agostu 2026.

Díli, 21 Agostu 2026 (RAFA) — Governu Timor-Leste no Governu Japaun, Sesta ne’e, asina akordu subvensaun ba projetu Bolsa Estudu ba Dezenvolvimentu Rekursu Umanu (JDS)  ho motante millaun ¥176 (millaun 1.1 USD)  ba implementasaun programa iha tinan fiskál 2027.

Ministru Negósiu Estranjeiru no Kooperasaun, Bendito dos Santos Freitas, konsidera apoiu Japaun nian nu’udar investimentu estratéjiku ba dezenvolvimentu kapitál umanu, kapasidade institusionál no lideransa futuru Timor-Leste.

“Asinatura ne’e reprezenta investimentu estratéjiku ida ne’ebé kontinua iha kapitál umanu, kapasidade institusionál no lideransa futuru Timor-Leste nian,” Ministru Bendito Freitas haktuir.

Ministru Negosiu Estranjeiru no Kooperasaun apresia ba Governu no povu Japaun tanba amizade no kooperasaun ne’ebé kleur ona, liuliu iha apoiu ba dezenvolvimentu povu no instituisaun Timor-Leste.

Programa JDS komesa introdús iha Timor-Leste iha tinan 2018 no fó oportunidade ba funsionáriu públiku timoroan atu kontinua sira-nia estudu iha universidade sira iha Japaun.

Tuir dadus ne’ebé iha, to’o agora bolseiru timoroan na’in-52 mak hetan ona oportunidade estuda iha Japaun. Ho partisipante foun na’in-hitu ne’ebé sei ba Japaun iha fulan ida-ne’e no  númeru totál sei aumenta ba na’in-59.

Ministru Bendito Freitas hatutan investimentu iha rekursu umanu importante tebes ba Timor-Leste, liuliu iha períodu ida-ne’ebé nasaun tama iha faze foun dezenvolvimentu no aumenta nia envolvimentu rejionál no internasionál.

Nia subliña katak susesu dezenvolvimentu nasionál la depende de’it ba infraestrutura no rekursu finanseiru, maibé mós ba ema sira ne’ebé iha kapasidade, instituisaun efikás no administrasaun públika profisionál.

“Programa JDS kontribui diretamente ba objetivu ida-ne’e liuhosi hametin koñesimentu, abilidade no kapasidade lideransa iha ita-nia instituisaun públika sira-nia laran,” dehan nia.

Iha fatin hanesan, Embaixadór Japaun iha Timor-Leste, Yamamoto Yasushi, hateten katak asinatura troka nota ba programa JDS ne’e reafirma kompromisu Japaun no Timor-Leste atu kontinua aprofunda relasaun bilateral entre nasaun rua.

Nia dehan tan  Japaun durante tinan barak kontinua fó apoiu ba konstrusaun  Timor-Leste, inklui iha área infraestrutura, diversifikasaun industriál, servisu sosiál no governasaun, iha kuadru “Parseria Abranjente” entre nasaun rua.

Embaixadór Yamamoto mós subliña importánsia programa JDS nian iha preparasaun joven ofisiál Timor-Leste, hodi sira hetan koñesimentu no esperiénsia akadémika iha Japaun no, hafoin fila ba Timor-Leste, kontribui ba formulasaun no implementasaun polítika públika.

“Dezde 2019, partisipante Timor-Leste na’in-52 simu ona oportunidade liuhosi programa ne’e, no programa JDS ba 2027 sei fó oportunidade ba partisipante na’in-hitu atu kontinua estudu iha Japaun,”  Embaixadór Yamamoto hateten.

Embaixadór Yamamoto konsidera dezenvolvimentu lideransa foun nu’udar prioridade importante, liuliu agora Timor-Leste formalmente adere ona ba ASEAN.

Nia hein katak partisipante sira sei uza koñesimentu no esperiénsia ne’ebé sira hetan durante estudu hodi kontribui ba kreximentu sósiu-ekonómiku Timor-Leste, no mos sai ponte ba hametin relasaun entre Timor-Leste no Japaun.

“Asinatura akordu ne’e mos reafirma amizade no parseria kleur entre Timor-Leste no Japaun, ho kompromisu hamutuk atu kontinua investe iha rekursu umanu, hametin kapasidade institusionál no promove dezenvolvimentu sustentável iha Timor-Leste,” nia konklui.

Jornalista: Cesarina de Carvalho