IX Governu Konstitusionál Aprova Proposta Ratifikasaun Deklarasaun Admisaun Timor-Leste Ba ASEAN

IX Governu Konstitusionál halo diskusaun no análize servisu liuhosi reuniaun Konsellu Ministru sira-nian. Imajen/Média PCM

DILI, RAFA.tl– IX Governu Konstitusionál liuhosi sorumutuk Konsellu Ministru estraordináriu, Tersa (04/11/2025), aprova projetu proposta rezolusaun Parlamentu Nasionál ne’ebé aprezenta husi Ministru Negósiu Estranjeiru no Kooperasaun, Bendito dos Santos Freitas, ba ratifikasaun Deklarasaun Admisaun Repúblika Demokrátika Timor-Leste, ba Asosiasaun Nasaun sira Sudeste Aziátiku nian (ASEAN).

Notísia Relevante: Tama ASEAN, Hametin Seguransa no Estabilidade Polítika Rejionál Hodi Fortifika Ekonomia Timor-Leste 

Iha komunikadu ofisiál ne’ebé Rafa.tl asesu, husi Mídia gabinete Prezidénsia Konsellu Ministru, relata proposta rezolusaun ida-ne’e ho intensaun atu ratifika deklarasaun kona-bá Admisaun Repúblika Demokrátika Timor-Leste ba ASEAN, ne’ebé asina iha Malázia, iha loron 26 fulan-Outubru tinan 2025, durante serimónia adezaun plena Timor-Leste nian ba organizasaun rejionál ne’e.

Deklarasaun ne’e reprezenta aseitasaun polítika husi estadu membru ASEAN kona-bá inkluzaun Timor-Leste nian nu’udár estadu membru plenu direitu, tuir nú. 4 artigu 6.º husi karta ASEAN, ne’ebé nu’udár etapa esensiál ida ba integrasaun plena Timor-Leste nian, iha mekanizmu no estrutura sira organizasaun nian.

Iha reuniaun Konsellu Ministru ne’e mós, governu atribui podér tomak ba Ministra Edukasaun, Dulce de Jesus Soares, atu asina Memorandu Entendimentu ida ho Governu Singapura, ba kooperasaun iha ámbitu edukasaun, liu-liu iha formasaun ba profesór sira.

Ratifikasaun akordu kooperasaun iha Área Defeza entre Governu Malázia no Governu Timor-Leste.

Governu mós aprova projetu ne’ebé aprezenta hosi Ministru Defeza, Donaciano do Rosário Gomes, hodi ratifika akordu kooperasaun iha Área Defeza, entre Governu Malázia no Governu Repúblika Demokrátika Timor-Leste.

Entre objetivu prinsipál sira hosi akordu ne’e maka, hametin relasoens bilaterais iha área militár, liu-liu liu-hosi diálogu polítiku estratéjiku regulár, fahe informasaun no esperiénsia sira, interkámbiu pesoál no formasaun téknika no mós militár, hala’o ezersísiu hamutuk no kooperasaun iha área siénsia, teknolojia no indústria defeza nian.

Dokumentu ne’e mós rekoñese knar Malázia nian nu’udár parseiru defeza konfiável Timor-Leste nian dezde restaurasaun independénsia, ne’ebé reafirma kompromisu hosi Governu rua ne’e hodi promove pás, seguransa no estabilidade rejionál iha ámbitu ASEAN, ne’ebé Timor-Leste agora sai membru plenu direitu.

Reportajen ekipa Rafa.tl