Italo Soares Pimentel Provizoriamente Lidera Mellór Markadór Liga Timorense Époka 2026

Italo Soares Pimentel. Imajen/LFTL

Díli, 13 Jullu 2026 (RAFA.TL) – Jogadór estranjeiru no mákina produs golu ekipa AD SLB Laulara, Italo Soares Pimentel, provizoriamente lidera mellór markadór Liga Timorense Primeira Divizaun époka 2026 hafoin marka golu neen durante jogu lima hamutuk ho nia ekipa.

Performa brillante husi jogadór estranjeiru ho nasionalidade Brazileiru ne’e la’ós de’it lori nia sai mellór markadór iha kompetisaun, maibé mós kontribuisaun boot ba ekipa AD SLB Laulara hodi lidera tabela klasifikasaun provizóriu ho pontu 19 husi  jogu hitu no Makikit Laulara manán dala-neen no empata dala-ida.

Atakante brazileiru ne’e la’ós oin foun ba liga Timorense  tanba iha époka sira antes nia reforsa ona Klubu Lalenok United ne’ebé mos hanesan klubu kampeaun ba Liga Futeból Timor-Leste iha époka sira antes.

Jogadór estrella ekipa Makikit Laulara ne’e marka golu neen ba nia ekipa iha jogu kontra adversáriu FC Porto Taibesse, golu rua hasoru DIT F.C, golu rua hasoru Karketu Dili F.C, no aumenta tan golu ida hasoru Emmanuel F.C iha jornada da-neen.

Iha pozisaun daruak, Jogadór estranjeiru husi ekipa Santa-Cruz F.C, Vincent Noerty ho golu lima. Enkuantu jogadór estranjeiru Karketu Díli F.C Daniel Asino, okupa fatin datoluk ho golu haat.

Ho kompetisaun ne’ebé hela de’it jornada tolu atu remata, disputa ba premiu prestiziu mellór markadór sei nakloke ba jogadór avansadu sira hotu.

Kada jornáda bele lori mudansa foun iha lista markadór, tanba diferensa entre mellór markadór sira ki’ik tebes.

Rivalidade ida-ne’e sei atrai adeptu sira atu iha kuriojidade atu kontinua akompaña sira nia ekipa no jogadór favoritu atu manán premiu mellór markadór iha Liga Timorense époka 2026.

Jornalista: Davilio Valdemir/Editór: Vito Salvadór