Italo Soares Pimentel Marka Brace Lori Makikit Halakon DIT F.C ho Score 2-0

Jogu DIT F.C vs AD SLB. Imajen/LFTL

Díli, 29 Juñu 2026 (RAFA.TL)- Jogadór estrella ekipa AD SLB Laulara (Makikit Laulara), Italo Soares Pimental marka golu rua (Brace) hodi lori nia ekipa rekolla pontu tolu no halakon DIT F.C ho score 2-0.

Deulo entre ekipa rua ne’ebé hala’o iha Estádiu Munisipál Díli, Domingu (28/06/2026), ekipa rua  diretamente hatudu sira-nia superioridade oinsá halima bola iha kampua hodi lansa kontra atake ba malu  no buka oportunidade atu marka golu  iha priemeira parte.

Ekipa rua konsege kria oportunidade barak ba ida-idak nia ekipa, maibé finalizasaun ne’ebé ladun efetivu no liña defeza hosi parte rua mantein solidu, nune’e tentativa golu hotu la konsege muda rezultadu.

Ho ritmu jogu ne’ebé iha, ekipa rua ne’e nafatin buka dalan atu bele produs golu, maibé laiha ida mak marka uluk golu to’o jogu primeira parte termina no ekipa rua ba intervallu ho score 0-0.

Kontinua ba jogu segunda parte, ritmu jogu komesa manas. Ekipa rua ne’e ansa kontra atake ba malu ho intensiddade aas. Nune’e tama ba iha minutu 78 Atakante AD SLB Laulara Italo Soares Pimentel susesu marka golu ba rede DIT F.C hafoin hatudu nia asaun hodi ultrapasa defeza DIT F.C iha grande area hodi muda kedas score ba 1-0.

Sofre ona golu ida ida DIT F.C tenta buka golu responde atu halo balansu ba score liu husi kontra atake ne´ebé lais maibé defeza hosi ekipa AD SLB Laulara mantein solidu hodi la fo fatin ba ekipa DIT F.C atu marka golu.

Tama ba iha minutu 90+4 DIT F.C obrigadu tenke joga ho jogadór na´in-10 hafoin Pedro Fernandes sofre kartaun mean,  Ad SLB Laularan aproveita kedas oportunidade ne´e hodi lansa kontra atake ba adversáriu no tama ba mminutu 90+12 AD SLB Laulara aumenta tan golu ida liu husi jogadór Italo Soares Pimental liu husi penalti hafoin jogadór DIT F.C komete erru iha area gradeal laran no muda score ba 2-0.

Husi rezulatadu Vitóri ne’e lori Ekipa SLB iha pozisaun dahuluk ho pontus 10 hanesan ho Karketu Díli FC maibé ekipa SLB liu iha produtividade golu. Enkuantu ekipa DIT F.C mantein iha pozisaun da-neen ho pontu tolu husi jogu haat derota dala tolu no manan dala ida.

Jornalista: Davilio Valdemi/Editór: Vito Salvadór