Italo Soares Pimental Sai Mellór Markadór ho Golu Ualu

Italo Soares Pimental sai hanesan mellór markadór Liga Timorense Époka 2026.

Díli, 23 Jullu 2026 (RAFA.TL)-Jogadór estranjeiru no hanesan estrala ba ekipa AD SLB Laulara (Makikit Laulara), Italo Soares Pimental sai hanesan mellór markador ho golu ualu no iha direitu ba premiu individu ba osan ho valor US$1,000.00.

Jogadór estranjeiru ho nasionalidade Brazil ne´e hatudu nia performa ida konsistente durante Liga Timornse Primeira Divizaun époka ne´e hodi sai hanesan predatór ekipa Makikit Laularan nian ba adversáriu sira iha kada jogu.

Avansadu ikoniku ekipa Makikit Laulara ne´e hatudu estastika jogu ida di´ak ho performa ne´ebé brillante hodi marka golu ualu duarante jogu ualu ba ekipa AD SLB Laulara. Nia marka golu ida hasoru F.C Porto Taibesse, golu rua hasoru DIT F.C, golu rua hasoru Karketu Dili F.C, golu ida hasoru Emmanel F.C, golu ida hasoru hasoru Coração F.C no ikus liu marka tan golu ida ba Aitana F.C iha jornada ikus Liga Timorense.

Italo Soares Pimental sai mós hanesan jogadór ne´ebé barak liu fo nia kontribuisaun ba ekipa Ad SLB Laulara nia susesu ba kampiaun Liga Timorense époka ne´e hodi sai hanesan ekipa kampiaun.

Durante jogu jogadór ne´ebé la’ós ona oin foun ba Liga Timorense ne´e sempre hatudu motivasaun no ambisaun oinsá organiza nia maluk jogadór sira iha kampu laran atu joga tuir orientasaun treinadór nian no hatudu performa ida masimu ba rekolla vitória.

Ho premiu individu ne´ebé Italo Pimental hetan sai mós hanesan motivasaun ba jogadór nasionál sira atu mantein disiplina iha treinu no halo esforsu sira hodi hetan titúlu ne´e iha kompetisaun sira tuir mai iha Liga Timorense époka oin.

Jornalista: David Gonçalves/Editór: Vito Salvadór