Investór husi Nasaun-tolu Aprezenta Planu Investimentu iha Área Agrikultura, Aviasaun no Finansas Ba Governu

Investór husi Xina, Hong Kong no Singapura, hasoru malu ho Governu Timor-Leste hodi aprezenta planu investimentu iha área importante sira hanesan agrikultura, aviasaun no finansas, Sesta (16/01/2026). Imajen/Rafa.tl

DILI, RAFA.tl– Investór husi  Xina, Hong Kong no Singapura, Sesta (16/01/2026), iha Palásiu Governu, aprezenta planu investimentu iha área importante sira hanesan agrikultura, aviasaun no finansas ba Governu Timor-Leste.

Notísia Relevante: TL-Japaun Kontínua Hametin Kooperasaun iha Área Turizmu, Agrikultura no Infraestrutura

Investór husi Xina, Hong Kong no Singapura ne’e, aprezenta direta planu investimentu iha área agrikultura, aviasaun no finansas ba Primeiru-Ministru (PM), Kay Rala Xanana Gusmão, akompaña hosi Vise Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Ministra Finansas, Santina Cardoso, Ministru Planeamentu no Investimentu Estratéjiku, Gastão Sousa ho Vise-Ministru ba Infraestruturas, Júlio do Carmo.

Hafoin rona planu investimentu husi emprezáriu sira husi nasaun-tolu ne’e, Ministru Planeamentu no Investimentu Estratéjiku, Gastão Sousa, ba jornalista sira hatete, enkontru espesiál ho  maluk investór sira husi Xina, Hong Kong no mós Singapura iha ko’alia liubá iha área agrikultura, finansas no mós iha aviasaun nian.

“Investór sira  ko’alia iha área agrikultura iha produtu balun ne’ebé sira aprezenta liu-liu kona-bá du’ut sira ne’ebé bele fó rezultadu ba buat barak hanesan fó han ba animal sira no mós bele produs buat sira seluk,” Ministru Gastão Sousa. informa

Governante ne’e hateten investór sira ko’alia liubá iha área aviasaun no mós investimentu finansiál oinsá atu hanoin ba oin, hanesan ezeplu  governu estabelese ona banku dezenvolvimentu nasionál no sei haré hamutuk oinsá ba oin liu-liu iha sira-nia partisipasaun iha dezenvolvimentu setór finanseiru hodi bele ajuda Timor-Leste nia pekenas empreza.

Iha sorin seluk, koordenadór ba ekipa Investór husi nasaun tolu ne’e, Michael Ong, kontente tebes tanba bele lori Investór husi Xina hodi ajuda investimentu iha Timor-Leste no konsidera atu ajuda propriedade iha ne’e no ajuda populasaun iha Timor Leste.

“Ami iha Sr. Rudy Juan iha ne’e ba aviasaun, nune’e ami sei iha diskusaun ida ho na’in ba Aviaun Aero Díli, Lourenço de Oliveira kona-bá Road DV, inklui investimentu iha indústria aereu, no ami iha Sr. Terence, husi Hong Kong, ne’ebé haré ba mikrofinansiamentu iha ne’e, ne’ebé ho esperansa sei servisu besik ho ministériu Finansas kona-bá ida ne’e,” Michael Ong hateten.

Governu halo hela análize atu haré oportunidade saida mak bele aproveita hosi projetu investimentu hirak ne’e, no Primeiru-Ministru (PM), Kay Rala Xanana Gusmão, mós fó ona orientasaun ba Ministériu tutelada sira, liu-liu sira ne’ebé partisipa iha enkontru ne’e atu haré oportunidade ba estabelesimentu kooperasaun iha área interessada ne’ebé aprezenta ona.

Reportajen ekipa Rafa.tl