Inisiu Outubru, Governu Submete OJE 2026 Ba Parlamentu Nasionál

Primeiru-Ministru Kay Rala Xanana Gusmão. Imajen/Rafa.tl

DILI, RAFA.tl– Primeiru-Ministru (PM), Kay Rala Xanana Gusmão, informa iha inisiu fulan-Outubru 2025, Governu  haruka Orsamentu Jerál Estadu (OJE) 2026 ba Parlamentu Nasionál.

Tuir Lei Enkuadramentu Orsamentu Jerál Estadu no Jestaun Finanseira Públika, Projetu Proposta Lei OJE tinan 2026 nian tenke submete ba Parlamentu Nasionál to’o loron 01 fulan-Outubru tinan 2025.

“Ha’u mós temi ba Prezidente Repúblika, ohin mós ami sei diskute iha Konsellu Ministru, loron 01 fulan-Outubru, sei haruka Orsamentu Jerál Estadu 2026 ba Parlamentu Nasionál,” Primeiru-Ministru Kay Rala Xanana Gusmão haktuir ba jornalista sira hafoin enkontru semanal ho Prezidente Repúblika José Ramos-Horta, iha Palásiu Prezidensiál, Kinta (25/09/2025).

Xanana Gusmão hateten, iha Orsamentu Jerál Estadu ba tinan 2026, iha problema barak, tanba ne’e koa hotu, no tau prioridade ba saida mak sei fó benefísiu ba povu, tanba ida ne’e duni mak hakarak hadia.

Xefe Governu subliña atu harii sistema iha funsaun públika rasik mós, tanba señór ida ne’eba direitór di’ak ida, servisu ho ha’u kapás tebe-tebes, servisu kapás tebe-tebes, mais tanba ida ne’ebá hetan tiha ona fatin di’ak ida, tanba sira kolega, primu, amigu, bolu nia bá fali servisu iha ne’eba. Nia husu lisensa seim vensimentu, nia nu’udár direitór manan uitoan mais servisu kapás, nia bá ne’eba nu’udár asesor simu US$8-9 mill la halo buat ida, ne’e tenke kurije.

“Ne’e mak iha OJE 2026 ami koa hamutuk ho funsaun públika, hodi hadia nune’e ita monta sistema di’ak ida ba ida ne’e, ba ida ne’eba, iha administrasaun públika, iha setór saúde, setór edukasaun, setór sira seluk, tékniku hodi ita hadia, ne’ebé labarik kiik oan sira ne’ebé ba manifesta hakilar, ha’u hein de’it ha’u ba toba ona,” Xanana esplika.

Primeiru-Ministru mós husu ba foin-sa’e sira ne’ebé agora sai matenek, prepara-an ba, prepara-an diskute problema iha ida-idak nia universidade sira, diskute problema estadu nian, oin nusa, bele hadia.

“Ida-ne’e mak loke imi nia matenek, bainhira ami laiha ona, imi kaer fali Timor ne’e ho matenek liu, ho intelejensia ne’ebé lian liu ne’ebé halo sai kapás liu tan,” Xanana afirma.

Governu sei aselera servisu sira adezaun ba ASEAN

Primeiru-Ministru Kay Rala Xanana Gusmão mós hateten, Governu sei servisu maka’ás atu aselera aprovasaun ba rezolusaun lubuk kona-ba Tinor-Leste nia,adezaun ba membru plenu ASEAN iha fulan-Outubru tinan ne’e.

“Ha’u informa mós ba Prezidente Repúblika, Kuarta-feira dala rua laiha tiha reuniaun Konsellu Ministru, agora ha’u  sai, ami sei reuniaun Konsellu Ministru, atu aprova haruka rezolusaun lubuk ida kedas ba tan Parlamentu Nasionál hodi aprova tiha tanba preparasaun kona-ba ASEAN nnian,” Xanana Gusmão hateten.

Reportajen ekipa Rafa.tl