Inisiadór RAIMAKMOR Armando Ximenes Sei Keixa Estrutura Ba Ministériu Públiku

Polísia Vera Kruz, Munisípiu Díli bolu insiadór kompañia RAIMAKMOR, Armando Ximenes relativa ho keixa no lamentasaun kliente sira nian ne'ebé konsidera RAIMAKMOR bosok sira. Imajen/Rafa.tl

DILI, RAFA.tl – Inisiadór no diretór ba kompañia RAIMAKMOR, Armando Ximenes, promete ba  kliente sira ne’ebé sai vítima atu devolve fila sira-nia osan, maibé presiza  halo verifikasaun iha estrutura tanba tuir relatóriu  osan balun laiha  tanba ne’e  nia sei keixa estrutura ba Ministériu Públiku tanba halakon osan.

Notísia Relevante: Kliente Kompañia RAIMAKMOR Na’in-200 Ezije Devolve Sira-Nia Osan

“Ha’u mai ne’e nu’udar inisia programa, maibé la’ós ha’u maka jere, no iha diretór ho ida-idak nian, maibé nu’udar insiadór ha’u mai para atu bele haré didi’ak hodi responde oinsa  atu devolve kliente sira-nia osan tanba sira balun hakarak rejigna aan. Ha’u foti konkluzaun katak sira balun iha nasional ne’e jere sala, ha’u rasik mak sei lori ba Ministeriu Publiku,” Armando Ximenes informa hodi responde  jornalista sira iha Polísia Eskuadra Vera Kruz, Díli, Kinta (29/01/2026).

Inisiadór RAIMAKMOR ne’e fó sala ba estrutura sira ne’ebé durante ne’e responsabiliza sukursál sira to’o mai iha nasionál tanba vítima balun ezije sira nia osan, maibé laiha karta konkordansia.

“Tanba ninia impaktu ne’e halai hotu mai ha’u, afinál  ha’u inisia buat ne’e sira dia’k, maibé jere ne’e la’o sala, tanba ne’e ha’u  nia inan-feton sira, horseik ne’e, iha ona konkluzaun ida-idak hakmatek hein de’it ona para fó sai de’it ona nia rejultadu,” Armando Ximenes hateten.

Iha fatin hanesan vítima Zelia Maria Odete, ejizi kompañia RAIMAKMOR atu responsabiliza hodi devolve  sira nia osan, tanba sira hatama osan iha tinan kotuk, maibé laiha rezultadu.

“labele kleur, ha’u mós hatama osan iha loron 03 fulan-Abríl tinan 2025, ami nia osan US$85.00, tenke konfirma iha relatóriu, tuir lolos ne’e kuandu ema hatama osan nu’udar prezidenti ba kompañia tenke verifika, ita haluha loos ne’e atu halakon ema nia osan ne’e labele, buat ne’e responsabiliza ita nian, ami persiza osan ne’e atu haré labarik sira-nia eskola,” Zelia Maria Odete hateten.

Iha fatin hanesan, vítima Filomena de Rosa haktuir programa ne’ebé kompañia RAIMAKMOR iha ne’e atu ajuda ema hodi fó kreditu, maibé ema hatama tiha osan ikus mai la sai realidade.

“Ida ne’e mak ami lakohi, ami sente liafuan ida ne’ebé dehan atu ajuda ami, ami mós kontente tanba liafuan sira ne’ebé fó mai ami,  ha’u mós hatama osan hein atu foti kréditu  hodi ajuda oan sira ba eskola no osan balun hodi halo negósiu,  maibé laiha,” Filomena de Rosa hateten ho hirus.

Informasaun ne’ebé Rafa.tl rekolla husi kliente sira RAIMAKMOR nian iha resintu Eskuadra Polísia Vera Kruz katak, kliente sira ne’ebé sai vítima ba RAIMAKMOR ne’e balun hatama osan ho montante US$2000.00 to’o US$3000.00 no balun fa’an nia karreta ho motór hodi hatama osan ho garantia atu bele foti fali kréditu iha RAIMAKMOR, maibé to’o ohin loron balun besik tinan ona, la hetan kréditu no senti osan sira ne’e lakon tiha de’it.

Tuir kompromisu ne’ebé RAIMAKMOR halo ho kliente sira katak, hatama US$100.00 bele foti krédiu US$1000.00 no sira ne’ebé hatama US$1000.00 bele foti krédiu US$10,000.00.

Reportajen ekipa Rafa.tl