Inglaterra Avansa Ba Kuartu-Finál Kopa Mundiál Hafoin Halakon Uma-Na’in Méxiku 3-2

Inglatera avansa ba Kuartu-Finál kopa Mundiál 2026 hafoin halakon nia adversáriu Méxiku ho score 3-2. Imajen/AP

Díli, 06 Jullu 2026 (RAFA.TL)- Ekipa Selesaun Nasionál Inglatera avansa ba Kuartu-Finál kopa Mundiál 2026 hafoin halakon nia adversáriu  Méxiku ho score 3-2.

Joga iha Estádiu Banorte, Sidade Méxiku, Segunda (06/07/2026), Inglaterra no Méxiku hanesna ua-na’in hatudu jogui ida agresivu desde primeira parte.

Méxiku tenta kedas atu aplika presaun maka’ás ba defeza Inglaterra nian iha minutu datoluk, Raul Jimenez hasai suta ida ne’ebé hetan blokeiu husi Konsa.

Liutiha minutu 12, Jimenez ameasa fali, maibé nia kabesa husi área penalti nia laran hetan salvasaun ho fásil husi Jordan Pickford.

Ikus mai, Inglaterra kria oportunidade osan-mean iha minutu 26; tiru ida husi Anthony Gordon maibé sei bele salva husi  adversáriu.

Iha minutu 36, Bukayo Saka, ne’ebé maka halo operasaun iha parte loos, halo kruzamentu ida ne’ebé maka di´ak no Jude Bellingham iha pozisaun di´ak hodi lansa kedas golu no muda score ba 1-0.

Liu deit minutu rua, Jude Bellingham marka tan golu ida hodi muda score ba 2-0 iha minutu 38 hafoin aproveita assistensia husi Harry Kane.

Ekipa Méxiku ne’ebé la hakmatek no kontinua lansa atake sira ne’ebé ikus mai tama ba iha minutu 42, jogadór Julian Quinones lansa golu ida hodi hamihis score ba1-2 hafoin aproveita bola livre iha area penalidade oin. No score ne´e mantein too primeira parte termina.

Hafoin intervallu, ekipa rua hahú ho hasa’e kedas intensidade jogu. Ekipa Méxiku no Inglaterre hala’o jogu nakloke, depende ba atake sira hosi parte sorin.

Tama ba minutu 53 ,Inglaterra tenke joga deit ho jogadór na’in-10 hafoin Jarell Quansah hetan kartaun mean tamba halo falta maka’as ida hasoru Gallardo.

Méxiku aproveita kedas oportunidade no vantajen ne´e hodi halo jogu ida ho atake makas maibé sorte aat monu ba Méxiku iha minutu 58 hafoin jogadór sira halo falta hasoru Gordon iha área penalti nia laran. Kane hakat ba oin hodi foti suta no halo suta maka’as ida ba baliza nia sorin karuk no golu ne´e muda kedas score ba 3-1.

Lium tiha minutu 10, árbitru aponta ba pontu penalidade nian hafoin falta ida hosi Marc Guehi hasoru jogadór Méxiku no Jimenez hakat ba oin no ho susesu konverte penalidade, hodi hamihis score ba 2-3.

Ekipa Méxiku kontinua lansa atake sira ba adversáriu no iha minutu 80, Edson Alvarez hetan oportunidade osan-mean, maibé nia kabesa halai sees hosi baliza Pickford nian. No Inglaterra ne´ebé lidera jogu ne´e iha tabela score mantein halo jogu ida ho defeza metin hodi asegura vitóri ne´ebé iha.

Ho rezultadu ne’e, ekipa Thomas Tuchel nian avansa ba kuartu-finál, iha ne’ebé sira sei hasoru Noruega, ne’ebé antes ne’e halakon ona Brazil ho 2-1 iha Jornada 16.

Jornalista: Marito da Costa/Editór: Vito Salvadór