INFPM Enfrenta Stock Out Ai-Moruk Item 32%

Armazén INFPM iha Kampu Alor, Díli. Imajen/Rafa.tl

DÍLI, RAFA.tl– Daudaun ne’e, ai-moruk item 32 stock out iha armazén Institutu Nasionál Farmásia no Produtu Médiku (INFPM).

Ho numéru persentajen stock out ne’e, Diretora Ezekutiva INFPM, Paulina Mendonça, konsidera tama iha kategoria normal no  bele garante to’o fulan hira ba oin.

“Agora ami halo hela ezersisiu, aban ka bainrua, ai-moruk sira no sasán tama ona mai hodi responde ba item ai-moruk ne’ebé agora dau-daun stock out, ” Diretora Ezekutiva INFPM Paulina Mendonça, informa iha ámbitu sorumutuk ho Komisaun F Parlamentu Nasionál iha ármazén INFPM, Kampu Alor, Díli, Kuarta (11/03/2026).

Diretora Ezekutiva ne’e subliña, akizasaun ai-moruk ba tinan 2026 nian, prepara ona atu loke tenderizasaun iha tempu badak.

Komisaun F Parlamentu Nasionál ne’ebé trata asuntu Saúde, Igualdade Jéneru no Seguransa Sosiál, halo fiskalizasaun  ba iha armazén INFPM hodi haré besik liu tan servisu INFPM nian ho mós buka hatene kuantidade stock  ai-moruk  iha aramzén Estadu nian ne’e.

Prezidente komisaun F, Deputada Maria Gorumali, informa  primeira-vez Komisaun F halo vizita mai INFPM iha tinan 2026 ne’e  hodi haré liubá stock ai-moruk ne’ebé mak disponível no la disponivél, inklui konsulta ho INFPM  nia lista kona-bá item ai-moruk hira mak eziste  iha rai laran.

Dadus ne’ebé Komisaun F rekolla husi INFPM katak, daudaun ne’e stock ai-moruk item 1407 no ai-moruk ne’ebé disponível  hamutuk 68% no ai-moruk la disponível ka stock out hamutuk 32%.

Tuir Komisaun F nia estimasaun katak  ai-moruk item 32%  stock out ne’e konsidera númeru aas, maibé husi klarifikasaun INFPM nian katak item 32% stock out ne’e tanba ai-moruk sira ne’e halo ona distribuisaun ba INFPM nia rejionál sira, hanesan iha Munisípiu Baucau, Bobonaro  no Covalima.

Reportajen ekipa Rafa.tl