Ilas Na’in Feto Imaculada Conceição Vizita Aldeia Moris Ba Dame

Ilas Na’in Feto Imaculada Conceição da Virgem Santa Maria. Imajen/Rafa.tl

DILI, RAFA.tl– Sarani Aldeia Moris ba Dame, Parokia Sé Katedrál Díli, simu ho ksolok, mahein Imaculada Conceição da Virgem Santa Maria, ne’ebé vizita sira iha estasaun São Francisco Xavier, Ailok-Laran, Suku Bairu Pité.

Hanesan ona tradisaun, kada tinan Parókia sé Katedrál Díli, realiza programa lori ilas mahein Imaculada Conceição da Virgem Santa Maria ba vizita estasaun sira ne’ebé pertense ba Parókia, nu’udár meius pastoral no katekeze hodi hametin no haboot sarani sira-nia fiar no devosaun ba Maria Virgem Sala Laek.

Iha vizita ba Estasaun São Francisco Xavier Ailok-Laran, liu-liu iha Gruta Aldeia Moris ba Dame durante kalan ida, sarani sira iha Aldeia refere simu ho entuziazmu no kontenti, tanba Ilas Na’in Feto Imaculada Conceição da Virgem Santa Maria foin  vizita ba dala uluk iha sira nia Aldeia, liu-liu Gruta Aldeia Moris ba Dame.

Iha omilia Pároku Parókia Imaculada Conceição Sé Catedrál Díli, Pe. Paulos Maia ba sarani Aldeia Moris ba Dame, Kinta kalan (27/11/2025) hateten, Na’i Jesus fó hanoin ba sarani sira hotu bainhira tentasaun sira mosu mai nu’udár sinál ida atu bolu atensaun ba sarani sira atu hamrík metin hanesan ema fiar na’in.

‘’Loron ba loron sempre muda, tempu ne’e muda, muda ita nia hanoin, muda ita nia hakarak, muda ita nia hahalok, muda ita nia an tomak, muda ita nia moris tomak, dalaruma uluk ema ida ne’ebé badinas missa, badinas reza derepente baruk reza ona no baruk ba missa ona, ka oin seluk fali sira ne’ebé uluk baruk ten, agora badinas reza no badinas ba missa, buat sira ne’ebé oras ne’e dau-daun akontese iha ita nia leet, Jesus konvida ita atu tau atensaun ba ida ne’e, labele ta’uk,’’ Padre Paulos Maia hateten.

Saserdote ne’e hatutan katak,  vizita Na’in Feto nian ne’e la la’o mesak no la’o hamutuk ho Jesus.

‘’Ita buka hatudu nafatin ita-nia fiar iha Na’in Feto, iha Na’in Feto ne’ebé lori Jesus mai besik ita ho intensaun ida atu lori mós ita besik ba Jesus, hein katak ema sira ne’ebé Na’in feto ohin liu sira haré sira bele laran monu ba Na’in Feto, Na’in Feto laran monu tiha ona ba sira, maibé sira laran monu ka lae? Depende ba sira, ne’e depende ba ema ida-idak atu haré ba Na’in feto,’’ nia tenik.

Iha fatin hanesan, Xefe Aldeia Moris ba Dame, Fabianto de Lay e Kalçona hatete, prezensa Ilas Na’in Feto Imaculada Conceição hanesan sarani katólika hodi hametin unidade, dame no domin iha Aldeia refere.

‘’Mai hametin liután ami nia domin, unidade no paz hanesan ohin amu nia omilia hatete katak moris ho fé ida ne’ebé maka fiar katóliku iha hamutuk di’ak liu tán ba futuru,’’ hatete Fabianto de Lay e Kalçona.

Iha vizita Ilas Na’in Feto ne’e mós sei iha reflesaun ne’ebé fó husi Padre Pároku Parókia Imaculada Conceição Sé Katedrál Díli Padre Paulos Maia no sei kontinua vizita ba Uma-Laku Ailok-Laran.

Estasaun sira ne’ebé pertense ba Parókia Imaculada Conceição Sé Katedrál Díli mak hanesan, Estasaun São João Paulo II Vila-Verde, Sagrado Coração de Jesus Caicoli, São João Bosco Colmera, São Francisco Xavier Ailok-Laran no Sentru Pastorál Nossa Senhora Rainha da Paz Perumnas Bairo-Pité no iha selebrasaun Mahein Parókia Sé Katedrál nian ne’e, sei preenxe mós programa kompetisaun  sira hanesan, Lee Na’i Maromak Nia futar-Lia, Sertame, Coro, Novena ba Na’in Feto no asuntu preparativu sira seluk.

Reportajen Ekipa Rafa.tl