Igreja ho Estadu Sei Koordena Halo Transladasaun Restus Mortais Dom Martinho Lopes ho Bispu Timoroan Na’in-rua iha 2026

Prezidente Konferénsia Episkopal Timorense (CET, sigla portugés), Dom. Virgílio Cardeal do Carmo da Silva, SDB hamutuk ho Bispu Dioseze Baucau Dom. Leandro Maria Alves no Bispu Dioseze Maliana Dom. Norberto do Amaral, hasoru malu ho Prezidente Repúblika, José Ramos-Horta iha Palásiu Prezidensiál, Tersa (16/12/2025). Imajen/Rafa.tl

DILI, RAFA.tl– Prezidente Konferénsia Episkopal Timorense (CET, sigla portugés), Dom. Virgílio Cardeal do Carmo da Silva, SDB hamutuk ho Bispu Dioseze Baucau Dom. Leandro Maria Alves no Bispu Dioseze Maliana Dom. Norberto do Amaral,  hasoru malu ho Prezidente Repúblika, José Ramos-Horta, hodi ko’alia kona-bá preparasaun atu translada restus mortais Dom. Martinho Lopes no Bispu Timoroan na’in-rua Dom. Jaime Goulart no Bispu José Joaquim Ribeiro ne’ebé maka oras ne’e halót hela iha Portugal.

Arsebispo Arkidioseze Metropolitana Díli, Dom. Virgílio Cardeal do Carmo da Silva, SDB  ba Jornalista sira iha Palásiu Prezidensiál, Tersa (16/12/2025) hatete, CET marka enkontru ho Prezidente d Repúblika José Ramos-Horta hodi diskute kona-bá transladasaun restus mortais Dom. Martinho Lopes hamutuk ho Bispu Timoroan na’in-rua hanesan Dom. Jaime Goulart no Bispu José Joaquim Ribeiro ne’ebé oras ne’e halót hela iha Portugal.

“Ami hatán ba karta husi Prezidente Repúblika kona-bá atu halo transladasaun ba Dom. Martinho Lopes nia restus mortais husi Lisboa mai iha Timor-Leste,” Dom. Virgílio Cardeal do Carmo da Silva hateten.

Arsebispo ne’e hatutan, Igreja mós iha ona planu atu translada mós restus mortais Bispu Timoroan na’in rua ne’ebé maka oras ne’e sei iha Portugal.

“Ami mós hanoin katak halo transladasaun ba Dom. Martinho Lopes nia restus mortais, Bispu Timoroan na’in-rua nian ne’ebé maka oras ne’e sei iha Portugal hanesan Dom. Jaime Goulart no Bispu José Joaquim Ribeiro mos sei lori hamutuk mai,” Arsebispu informa.

Iha sorumutuk ne’e, Prezidente Repúblika mós kontente katak ida ne’e hanesan momentu di’ak ida atu bele haré hamutuk, Igreja ho estadu bele iha akordu ba futuru hodi halo transladasaun ba restus mortais sira ne’e.

Planu ida ne’e sei realiza iha tinan 2026 no kona-bá fulan seidauk bele determina tanba iha hela faze aproximasaun no negosiasaun husi Governu ho uma Kreda espera katak tarde liu fulan-Outubru tinan 2026.

Prezidente Repúblika José Ramos-Horta sei fó apóiu tomak, liu-liu kona-bá koordenasaun ho ekipa sira iha Lisboa, servisu mós ho CET hodi bele realiza eventu ne’e ba tinan oin.

Reportajen Ekip Rafa.tl