Hibers Díli F.C Susesu Rekolla Billete Ba Primeira Divizaun Hafoin Halakon AC Mamura ho Score 4-1

Ekipa estimadu komunidade Taibesse, Hibers Díli F.C selebra vitória hafoin halakon nia adversáriu AC Mamura ho ho score 4-1, Domingu 07 Juñu 2026 iha Estádiu Munisipál Díli.

Díli, 8 Juñu 2026 (RAFAT.TL)– Ekipa estimadu komunidade Taibesse, Hibers Díli F.C susesu rekolla billete ida ba primeira divizaun iha époka oin hafoin halakon adversáriu AC Mamura ho score 4-1.

Billete promosaun ba primeira divizaun ne’e ekipa Hibers Díli F.C hetan hafoin iha jogu haat segunda divizaun grupu B, Hibers Díli F.C rekolla vitória tolu no empata ida no akumula pontu 10.

Ekipa AC Mamura ne’ebé provizoriamente iha segunda klasifikasaun tabela klasifikasaun grupu B rekolla deit pontu haat husi jogu tolu.

Ho rezultadu ne’ebé iha ekipa estimadu komunidade Cacaulidu, Suku Bairru-Pité ne’e laiha ona oportunidade atu hadau billete promosaun nian ba segunda divizaun.

Ekipa Hibers Díli F.C hetan billete promosaun ne’e hafoin iha jogu kontra AC Mamura iha Estádiu Munisipál Díli, Domingu (07/06/2026), ne’ebé konsege kebra ka halo sofre AC Mamura ho golu tolu ne’ebé lori vantajen ba Hibers Díli F.C hodi konkista vitória.

Jogu iha primeira parte Hibers Díli F.C ho AC Mamura hatudu sira performa furak hodi anima adeptu sira. Alende ne’e, halo kontra atake ba malu maka’ás hodi hadau malu oportunida atu marka uluk golu.

Tama ba minutu tolu ekipa Hibers Díli F.C hetan golu ida hafoin jogadór AC Mamura Critiamo Loiola halo auto golu hodi muda score ba 1-0.

Maske sofre auto golu ekipa AC Mamura kontinua hatudu vontade hodi lansa kontra atake no halo jogu ida ho intensidade aas, no ikus mai tama ba minutu 21 jogadór Nuno Valente marka golu ida hodi muda score ba 1-1.

Ekipa rua kontinua hatudu jogu ida ho balansu, maibé tama ba minutu 40 jogadór Hibers Díli F.C, Albert Tefa marka golu ida ba adversáriu hodi muda score ba 2-1 no ho golu ne’e ekipa rua mantein ho score ne’ebé iha to’o jogu primeira parte termina.

Tama ba segunda parte, Hibers Díli F.C tenta halo kedas kontra atake ba nia adversáriu AC Mamura no tama ba minutu 47 jogadór AC Mamura Elpidio Marques halo tan auto golu no Hibers Díli F.C lidera hikas jogu ho score 3-1.

AC Mamura hahú halo tranzisaun ba jogu no halo mós substituisaun ,maibé sei falla atu marka golu.

Hibers Díli F.C kontinua halo kontrolu másimu ba jogu no nafatin halo kontra atake. Tama ba minutu 68, jogadór AC Mamura Melchior Cristovão antisipa sala bola no halo tan auto golu no Hibers Díli F.C kontinua aumenta score ba 4-1.

Ho golu ne’e halo AC Mamura joga iha presaun nia laran tanba adversáriu sira konsege halo jogu ida dominante no obriga armada komunidade Mamura sira tenke rende sedu ho auto golu sira ne’ebé sira rasik produz.

Ekipa rua termina jogu ho Score 4-1 no ho rezultadu ne’ebé iha,Hibers Díli F.C mak lidera tabela klasifikasaun grupu B no iha oportunidade ba final segunda divizaun hodu hadau títulu kampiaun segunda divizaun no otomatikamente promovidu ona ba primeira duvizaun iha époka 2027.

Jornalista: Marito da Costa/Editór: Vito Salvadór