Hatama Kilat-Manu Ilegál, PNTL Asegura Sidadaun Estranjeiru Na’in-rua

Polísia prende kilat-manu ne'ebé sidadaun estranjeiru sira hatama ilegál mai Timor-Leste. Imajen/Média PNTL

DILI, RAFA.tl– Polísia Nasionál Timor-Leste (PNTL) asegura sidadaun estranjeiru na’in-rua husi Indonézia iha área Comoro ne’ebé deskonfia hatama kilat-manu ilegál mai Timor-Leste.

Notísia Relevante: PNTL Asegura Sigaru Marlboro Ilegál Karton 389

“Ami hetan informasaun katak motorista bus balun transporta kilat-manu ho marka PCP lori husi Atambua-Indonézia mai iha territóriu Timor-Leste, nune’e  ami halo intervensaun iha área Comoro, konsege  halo apreensaun ba sasan evidensia sira,” Portavós PNTL, Superintendente João Belo dos Reis hateten ba jornalista sira iha Kuartél Jerál PNTL, Dili, Tersa (07/10/2025).

Tuir kronolojia katak hafoin ekipa PNTL simu informasaun husi ekipa sekreta deskonfia sidadaun nain-rua hatama kilat-manu husi bus balun  ne’ebé halo viajen husi diresaun  Kupan mai Dili.

PNTL liuhosi Polísia Diresaun Investigasaun Kriminál Nasional (DIKN), hamutuk ho Polísia Eskuadra Dom Aleixo, halo kedas operasaun ba bus ne’e iha área Comoro  hodi asegura sidadaun na’in-rua ne’ebé deskonfia lori tama kilat-manu.

PNTL mantein servisu ho profisionál no ho vijilánsia másimu atu garante seguransa no asegura Timor-Leste husi tranzasaun ilegál sira ne’ebé lori risku no ameasa ba povu no nasaun.

Reportajen ekipa Rafa.tl