Hanoin Hikas Papa Francisco iha Timor-Leste, Sei Hala’o Misa Agradesimentu no Konsertu “Joven Barullu” iha Tasi-Tolu

Papa iha Timor Leste: “Ha’u sei la haluha imi nia hamnasa”. Imajen/Vaticano News

DILI, RAFA.tl – Kreda Timor-Leste sei selebra tinan ida vizita pastorál Sua Santidade Papa Francisco mai Timor-Leste ho misa agradesimentu no konsertu “joven barullu” ne’ebé sei hala’o iha Tasi-Tolu, Kuarta (10/09/2025).

Ajenda ne’ebé fó sai husi Konferénsia Episkopál Timorense (CET, sigla portugés), katak misa agradesimentu  ne’ebé sei hala’o iha tuku 18:00 Otl ne’e prezide husi Sua Eminénsia Dom Virgílio Kardeál do Carmo da Silva, SDB akompaña husi Bispu Dioseze Baucau, Dom Leandro Maria Alves ho Bispu Dioseze Malaina, Dom Norberto do Amaral.

Hafoin misa, iha tuku 20:00-21:00 Otl, kontínua kedas ho sasin ka partilla kona-bá Santu Padre nia vizita no konsertu “joven barullu” iha tuku 21:30 Otl to’o remata ne’ebé sei anima husi banda nasionál, banda komisaun diosezana, movimentu juvenil Katólika no asosiasaun juventude independente.

“Liu husi programa sira ne’e, konvida ita hotu atu bele partisipa hodi hanoin hikas Sua Santidade Maktoban Papa Francisco ho nia mensajen sira ne’ebé husik hela mai ita hotu iha rai doben Timor-Leste. Belun foin-sa’e sira no sarani tomak, keta haluha halo ita-nia fiar sai hanesan ita-nia kultura (que a vossa fé, seja a vossa cultura),” Sekretáriu Ezekutivu CET, Amu  Carlos Miguel Pereira Roben informa liuhosi konferénsia imprensa, Sesta (05/09/2025).

Uma Kreda Timor konvida sarani sira hotu atu hola parta iha santa missa asaun grasa  ne’ebé realiza iha Tasi-Tolu, iha loron 10 fulan-Setembru 2025 hodi hatudu  Timor oan nia domin ba Papa Francisco ne’ebé halo tinan ida vizita Timor-Leste iha loron 09-11 fulan-Setembru 2024.

“Ho fuan ne’ebé nakonu ho ksolok no gratidaun, Konferénsia Episkopál Timorense (CET) konvida sarani sira hotu atu mai partisipa iha santa missa asaun grasa nian, ba okaziaun primeiru aniversáriu vizita pastorál  Sua Santidade Papa Francisco nian mai rai doben Timor-Leste. Ita nia fuan no neon sei manas hela hodi hanoin prezensa istórika  maktoban  Papa Francisco nian iha ita rain, iha loron 09 to’o loron 11 fulan-Setembru tinan 2024,” Amu Carlos Roben hateten.

Papa Francisco  nia vizita sai nu’udár bensaun ida bá Timor no liuhosi nia enkontru sira ho ukun na’in sira, ho katuas-ferik sira, ho foin-sa’e sira, ho labarik sira no ho ema moras sira, hatudu duni katak Papa  Francisco nia domin boot mai povu Timor ne’ebé simples no fiar nain.

“Nia prezensa iha ita nia le’et, hametin liu tan ita-nia fiar, hafoun fila-fali ita-nia esperansa  no nia husik hela marka ida ne’ebé labele hasai husi ita hotu nia fuan. Iha loron espesiál ida-ne’e, 10 Setembru 2025, mai ba ita hotu tau hamutuk ita-nia orasaun atu agradese bá Maromak bá grasa hosi prezensa Santu Padre nian iha ita-leet, bá nia liafuan sira ne’ebé fó korajen mai ita no bá jestu  konkretu sira ne’ebé hatudu nia domin paternu, proximidade no atensaun ne’ebé nia fó mai ita Timor oan hotu,” Saserdote ne’e haktuir.

Padre Carlos Miguel Pereira Roben fó hanoin fali katak  molok Papa Francisco fila hikas bá Roma, iha enkontru ho foin-sa’e sira, Papa Francisco husik hela lia menon ida ne’e, “Obrigadu bá imi nia prezensa, ha’u sei husik hela rai ida-ne’e, ne’ebe nakonu ho hamnasa, ho imi nia oin midar sira no ho esperansa katak imi hotu iha ha’u nia fuan. Maromak haraik bensaun bá imi hotu.”

Papa Francisco deklara iha nia viajen fila bá Roma, ho liafuan murak ida, dehan “ha’u nia laran monu tiha ona bá Timor-Leste” tanba Papa  Francisco nia domin ida boot nune’ e, fiar katak oras ne’e maktoban Papa Francisco, harohan hamutuk ho Santu no Santa sira iha Lalehan mai rai no povo doben Timor-Leste.

Iha fatin hanesan Prezidente Ezekutivu Komisaun Nasionál Juventude Katólika Timor-Leste (CNJCTL-sigla portugés) Koordenadór Jerál Ekipa Sinodal,  Padre Francisco Indra do Nascimento Tex Seran, hateten CNJCTL maka órgaun ofisial husi CET  ne’ebé halo kna’ar nu’udár responsável bá asuntu pastorál foin-sa’e Katólika nian iha Kreda Timor.

Relasiona ho informasaun ne’ebé hato’o ona, tinan ne’e, CET fó konfiansa CNJCTL liuhosi Ekipa Sinodal ne’ebé envolve foin-sa’e sira husi komisaun diosezana tolu (Baucau, Dili ho Maliana), Movimentu Juvenil Katólika no Universitáriu sira hodi sai nu’udár responsavel másimu bá programa selebrasaun tinan ida vizita Sua Santidade iha Timor-Leste.

Preparasaun sira la’o duadaun no parte Igreja nakloke husu  Governu nia apoiu tomak atu buat hotu la’o di’ak. Kestaun teknika  no longistika sira husu apoiu másimu husi Governu, parte seguransa nia apoiu presiza asegura misa iha Tasi-Tolu atu  nune’e atividade hotu la’o ho di’ak.

Reportajen Ekipa Rafa.tl