Hafoin Empata 1-1, Paraguai Halakon Alemaña ho Penalidade

Mauricio iha jogu Alemaña hasoru Paraguai. Imajen/REUTERS

Díli, 30 Juñu 2026 (RAFA.TL)- Ekipa Nasional Alemaña eliminadu husi Kopa Mundiál 2026 hafoin falla iha penalidade hasoru Paraguia ho score 4-3, iha Estádiu Gillette, Foxborough, Tersa (30/06/2026).

Ekipa rua hakat ba faze penalidade hafoin empata 1-1 to’o tempu adiosional.

Iha inisiu jogu, Paraguai ameasa uluk liuhosi Junior Alonso, ne’ebé halo ligasaun ho kantu iha poste dook. Hafoin ne’e, Alemaña kontinua kontrola jogu no halo tentativa oioin hodi lansa amiasa oin-oin ba área penalidade Paraguai nian.

Alemaña luta atu kria ameasa jenuínu sira ba baliza Paraguai nian, maibé ekipa adversáriu mantein defeza ida ne’ebé dixiplinadu tebes iha minutu 20 dahuluk.

Alemaña tenta lansa atake oioin iha primeira parte tomak, maibé kruzamentu sira ba defeza adversáriu nian la konsege kria oportunidade sira atu marka golu.

Ho kontra atake ne’ebé iha, Paraguai hetan vantajen hodi marka uluk golu liu husi Julio Enciso iha minutu 42  hodi muda score ba 1-0 no rezultadu ne´e mantein too primeira parte termina.

Tama ba segunda parte, ekipa Alemaña ne’ebé domina jogu kuaze lansa atake sira ho perigu ba adversáriu hodi tenta atu marka golu no halo empate. Nune’e iha minutu 54 Kai Havertz marka golu ho kabesa ida hafoin simu asistensia husi lansamentu Florian Wirtz husi area penalidade nia liu no golu ne´e lori ekipa rua ba empate 1-1.

Alemaña kontinua domina jogu, no kria oportunidade iha minutu 77; Havertz hasoru kruzamentu ida ho ulun, maibé guarda-rede Orlando Gill konsege asegura bola ne’e. Paraguai defende ho rezolusaun iha segunda parte tomak. Alemaña labele hetan tan golu ida, no jogu kontinua ba minutu 30 husi tempu adisionál.

Tamba ba minutu 102 Alemaña marka golu daruak liuhosi Jonathan Tah nia kabesa hosi kantu, maibé golu ne’e la permite hafoin revizaun VAR nian tanba falta ida hosi Waldemar Anton hasoru guarda-rede.

Ekipa rua mantein ho score 1-1 durante períodu rua ho minutu 15 hosi tempu adisionál, nune’e jogu tenke deside liuhosi penalti.

Iha penalidade, Jogadór alemaun Kai Havertz halo suta dahuluk, maibé la konsege marka golu. Hafoin ne’e, Paraguai hetan vantajen hodi muda ba 1-0 hafoin Mauricio susesu marka golu.

Joshua Kimmich halo empata ba 1-1, maibé Paraguai avansa ho 2-1 tanba Gustavo Gomez nia penalti ne’ebé susesu.

Jamal Musiala halo empata ho 2-2, no Paraguai hetan fali vantajen ho 3-2 liuhosi Matias Galarza.

Woltemade la konsege halo empata ba Alemaña hafoin nia suta hetan salvasaun. Maibé, Antonio Sanabria lakon oportunidade hodi taka vitóri ba Paraguai, hafoin nia suta ba liur.

Nadiem Amiri mantein Alemaña nia esperansa moris hodi halo 3-3. Fabian Balbuena, ne’ebé bele marka vitóri ba Paraguai, mós la konsege marka golu.

Tah mós lakon, hodi tau fali Alemaña iha presaun nia okos. Ikus mai, Jose Canale asegura Paraguai nia fatin iha Jornada 16 ho vitória penalti 4-3.

Jornalista: David Gonçalves/Editór: Vito Salvadór