Guvernu Husu LFTL Halo Avaliasaun no Sukat Kapasidade Organiza Liga Ba Époka Oin Ho Kompetisaun Kompletu

Serimonia atribuisaun medalla ba jogadór siea ne'ebé sai kampiaun iha Liga Timorense Époka 2026 iha Estádiu Munisipál Díli, Kuarta 22 Jullu 2026. Imajen/LFTL

Díli, 23 Jullu  2026 (RAFA.TL)-  Governu liu husi Ministériu Juventude, Desportu, Arte no Klutura (MJDAK), husu ba órgaun Liga Futebol Timor-Leste (LFTL) atu halo avaliasaun no sukat mós ho kapasidade organizasaun nian hodi organiza Liga ba époka sira oin mai ho kompetisaun kompletu (Full Competition), iha jogu Uma-Na´in (Home) no Bainaka (Away) hodi kontribui ba dezenvolvimentu futeból ida mais kompetitivu ba jogadór sira.

“Órgaun liga tenke halo avaliasaun profundu hodi sukat kapasidade no identifika problema sira antes kontinua époka tuir mai,  nune’e bele hadi’a kompetisaun no fila ba tradisaun liga nian katak tenke iha segundu volta,” Ministru Nelio Isaac Sarmento ifnorma ba jornalista sira iha Estádiu Munisipál Díli, kuarta-ne´e.

Iha fatin hanesan, sekretáriu jerál Klubu AD SLB Laulara, Domingos Caero husu ba órgaun Liga tenke halo jestaun di´’k ba liga époka oin mai, atu nune’e, labele hamosu dúvida ba klubu sira, tanba klubu hotu investe ba jogadór sira ho intensaun hakarak kontribui ba dezenvolvimentu futebál iha Timor-leste.

“Ha´u Hanoin Ita organiza tenke ho di’ak, nune’e joga ne’e jogu full, nune’e labele mosu dúvida husi klubu sira. Ha’u Hanoin tinan oin órgaun liga tenke halo jogu ne’e kompletu ka full,” Nia subliña.

Hatán ba preukupasaun sira ne’e, Prezidente Órgaun LFTL, Ipolito Soares hatete nia parte hato’o proposta ba Governu atu époka oin mai kompetisaun bele hala’o ho sistema home and away tuir padraun ne’ebé iha atu bele mós kontribui ba hasae kresimentu jogadór sira nian no kontribui ba selesaun Nasionál Timor-Leste.

“Liga sei hato proposta para époka oin mai ita bele iha home no away iha jogu, signifika iha primeira no sigunda volta, ohin mós ita hatoo ba PM Xanana Gusmão hanesan Prezidente SLB no guvernu hein proposta para sira bele haré no iha posibilidade ita bele jogu kompletu,” Hatete Ipolitu Soares.

Iha enseramentu Liga Timorense époka ne´e mos, MJDAK husu ba Orgaun Liga atu prepara kalendariu kompetisaun iha fulan-Dezembru tinan ne’e no envolve klubu Primeira no Segunda Divizaun sira hotu nudar preparasaun antes hahú liga ba epóka tuir mai.

Jornalista: Marito da Costa/Editór: Vito Salvadór