Governu Timor-Leste Hato’o Solidariedade Ba País Aziátiku Sira Ne’ebé Afeta Inundasaun

Imajen/Gov.tl

DILI, RAFA.tl– Governu Repúblika Demokrátika Timor-Leste (RDTL) espresa nia solidariedade kle’an ba povu no Governu Indonésia, Sri Lanka, Tailándia, Malázia, no nasaun Sudeste Aziátiku sira seluk ne’ebé afeta ba inundasaun no rai-halai, halo ema liu rihun ida mate, ema atus ba atus lakon, no ema rihun atus ba atus dezlokadu.

Notísia Relevante: Xanana Husu Forsa Tarrefa Apoiu Umanitáriu Ba Filipina Kumpre Misaun no Servisu ho Laran

Iha komunikadu ofisiál Governu Timor-Leste nian ne’ebé Rafa.tl asesa husi Portal do Governu, Kuarta (03/12/2025, haktuir inundasaun no rai-halai ne’ebé afeta Sudeste Aziátiku, sai hanesan epizódiu ida ne’ebé aat liu iha tinan hirak ikus ne’e. Operasaun salvamentu no tulun nian kontinua iha rejiaun oi-oin, enkuantu nafatin buka ema sira ne’ebé lakon. Indonésia, liu-liu illa Sumatra, rejista númeru aas liu hosi vítima sira, ho mate no lakon atus ba atus, infraestrutura sira ne’ebé rahun no komunidade sira ne’ebé izoladu.

Iha Sri Lanka, Tailándia no Malázia, autoridade sira deklara ona estadu emerjénsia iha área oi-oin, iha ne’ebé ema millaun hetan prejuízu maka’as, rihun ba rihun iha abrigu temporáriu sira, no susar atu hetan asesu ba servisu esensiál sira, edukasaun no meius subsisténsia.

Primeiru-Ministru, Kay Rala Xanana Gusmão , hodi Governu no povu Timor-Leste nia naran, hato’o nia tristeza no solidariedade kle’an ba povu Indonésia, Malázia, Sri Lanka no Tailándia, ne’ebé terus tanba impaktu husi tempestade tropikál estremu foin lalais ne’ebé hamosu inundasaun no rai-halai maka’as tebes.

“Lakon moris no deslokasaun ema, trájiku no triste teb-tebes. Ami laran taridu tebes ho eskala trajédia ida-ne’e no senáriu sira kona-bá inundasaun no deslokasaun ema, ne’ebé hamosu preokupasaun boot iha Timor-Leste,” Primeiru-Ministru Kay Rala Xanana Gusmão hateten.

Porta-voz Governu no Ministru Prezidénsia Konsellu Ministru, Agio Pereira, afirma katak iha tempu susar ida-ne’e, Timor-Leste nia hanoin hamutuk ho vítima no sira-nia família no Timor-Leste rekoñese sira hotu ne’ebé komprometidu atu kontinua tulun komunidade sira ne’ebé afetada.

Governu Timor-Leste reafirma ninia konfiansa katak ho forsa no reziliénsia husi sira-nia povu, nasaun afetadu hirak ne’e sei rekupera no harí fila-fali.

Timor-Leste hamrík iha solidariedade ho ita nia bin-alin no maun-alin sira iha rejiaun aziátiku iha tempu susar no rekuperasaun ida-ne’e nia laran.

Reportajen ekipa Rafa.tl