Governu Suspende Temporáriu no Halo Revizaun Ba Konkursu Públiku iha Admisaun Ba Kursu Formasaun Ajente PNTL

PM Xanana Gusmão lidera reuniaun Konsellu Ministru iha Palásiu Governu, Kuarta (11/02/2026). Imajen/Gov.tl

DILI, RAFA.tl– Konsellu Ministru aprova projetu Rezolusaun Governu ne’ebé aprezenta hosi Ministru Interiór, Francisco da Costa Guterres, kona-bá suspensaun temporária no revizaun ba Konkursu Públiku Admisaun iha Kursu Formasaun ba Ajentes Polísia Nasionál Timor-Leste (PNTL).

Notísia Relevante: PDHJ Husu Suspende no Re-Anúnsiu Konkursu Públiku Foun Ba Kandidatu PNTL

Iha komunikadu ofisiál ne’ebé Rafa.tl asesa husi Portál Governu Timor-Leste, Kuarta (11/02/2026) hatete, ho desizaun ida-ne’e, Governu hakarak asegura transparénsia, legalidade, no kredibilidade iha prosesu rekrutamentu, hodi konsidera dúvida no preokupasaun sira ne’ebé hato’o hosi kandidatu sira no entidade oi-oin kona-bá kumprimentu ba rekizitu balun no regularidade iha faze konkursu nian. Ba ida-ne’e, Rezolusaun Governu prevé suspensaun temporária ba konkursu no reforsa mekanizmu supervizaun no fiskalizasaun.

Desizaun ne’e mós determina atu halo reestruturasaun ba Komisaun Monitorizasaun no Fiskalizasaun nian, liu husi integra membru nasionál no internasionál independente sira, nune’e mós halo revizaun kle’an  ba faze hotu-hotu hosi prosesu selesaun nian, ho nia objetivu atu hatene lolós faktus no potensialmente adota medidas koretivas.

Ho prosedimentu ida ne’e, Governu iha intensaun atu hametin sidadaun sira-nia konfiansa iha instituisoens públikas no atu garante katak asesu ba Polísia Nasionál Timor-Leste ne’e hala’o ho justu, imparsiál, no tuir lei.

Notísia Relevante: Deskonfia, Kandidatu Ajente PNTL ho Inisiál JGCM Laiha Diploma Sekundáriu Pasa Ba Teste Médiku

Reportajen Ekipa Rafa.tl