Governu Sei Halo Lei Hodi Taka Totál GAM no GAR iha Timor-Leste

PM Kay Rala Xanana Gusmão. Imajen/Rafa.tl

DILI, RAFA.tl – IX-Governu Konstitusionál ne’ebé lidera husi Primeiru-Ministru  (PM), Kay Rala Xanana Gusmão, iha ona planu halo Lei hodi taka totál grupu arte-marsiál (GAM) no grupu arte-rituál (GAR) iha Timor-Leste.

Xefe Governu hato’o deklarasaun ne’e relasiona ho kazu asaltu malu entre arte-rituál Kolimau 2000 ho komunidade Tibar hodi rezulta karreta ida rahun, uma tolu hetan estragus, inklui uma ida hetan sunu iha Domingu (25/01/2026).

Primeiru-Ministru Kay Rala Xanana Gusmão ba jornalista sira, hafoin hasoru malu ho Prezidente Repúblika José Ramos-Horta iha Palásiu Prezidensiál, Kinta, (29/01/2026) hateten, sei haré hodi hasai Lei ruma halakon tiha arte-marsiál tanba iha problema ruma sempre temi mak sira nia naran.

“Ne’e mak ami haré hela nafatin, atu hasai lei ruma para hakotu tiha arte-marsiál,” Primeiru-Ministru Kay Rala Xanana Gusmão hateten.

Governu liu husi reuniaun Konsellu Ministru,  iha loron 10 fulan-Dezembru tinan 2025 aprova projetu rezolusaun Governu nian, kona-bá períodu vijénsia suspensaun ba ensinu, aprendizajen no prátika arte-marsiál no taka temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika arte-marsiál nian ne’ebé aumenta tan to’o loron 30 fulan-Juñu 2026.

Desizaun ne’e fó kontinuasaun ba Rezolusaun Governu nú. 45/2023, loron 10 fulan-Novembru, ne’ebé mak extende ona tutuir malu  hosi Rezolusaun Governu n. 17/2024, loron 24 fulan-Abril, n. 60/2024, loron 7 fulan-Novembru, no nú. 22/2025,  loron 7 fulan-Abríl.

Presupostu sira ne’ebé justifika suspensaun ne’e vigora nafatin, liu-liu nesesidade atu hametin dame sosiál ne’ebé hetan ona dezde fulan-Novembru 2023 no atu garante katak prátika arte-marsiál sei bele halo de’it iha kontestu desportivu, hodi kontribui ba formasaun sívika no umanista ba joven sira.

Enkuantu IX-Governu Konstitusionál  foin lalais ne’e konklui prosedimentu lejizlativu hodi submete ba Parlamentu Nasionál proposta lei ida ne’ebé sei estabelese rejime jurídiku foun ba prátika arte-marsiál.

To’o nia aprovasaun no tama iha vigór, nafatin nesesáriu kontinuasaun ba suspensaun no enserramentu temporáriu ba fatin sira ne’ebé destinadu ba ensinu, aprendizajen no prátika arte-marsiál.

Reportajen ekipa Rafa.tl