Governu Sei Halo Alargamentu no Konstrui Jardim Diresaun Ponte B.J. Habibie Ba Cristo Rei

Ministru Obras Públika (MOP), Samuel Marçal aprezenta dezeñu Rotunda Meti-Aut atu hatuur estátua Lafaek ba Prezidente Repúblika, José Ramos-Horta. Imajen/Rafa.tl

DILI, RAFA.tl – Ministru Obras Públika (MOP), Samuel Marçal, Sesta (13/02/2026), hasoru malu ho Prezidente Repúblika (PR), José Ramos-Horta, hodi aprezenta kona-bá dezeñu konstrusaun jardim diresaun husi Ponte B.J. Habibie ba to’o Cristo Rei, inklui ho planu hatúr estátua Lafaek iha Rotunda Meti-Aut.

Ministru Obras Públika (MOP), Samuel Marçal, ba jornalista sira hatete, nia marka prezensa iha iha Palásiu Prezidensiál hodi responde ba konvite husi Prezidente Repúblika atu aprezenta kona-bá planu konstrusaun jardim husi diresaun Ponte B.J. Habibie to’o iha Cristo Rei, inklui rona mós planu ne’ebé aprezenta husi Xefe Estadu rasik, kona-bá hatúr estátua Lafaek  ne’ebé maka tempu badak sei to’o iha Timor-Leste.

Ministru Samuel Marçal hatutan, bazeia ba konstrusaun jardim no harí rotunda ne’e, Governu mós komesa deskobre uma-kain balu, no negosiante sira iha diresaun Meti-Aut, atu halo alargamentu molok konstrusasun hahú.

Prezidente Repúblika mós konkorda ho planu ida ne’e, karik alargamentu ida-ne’e Prezidente nia rezidénsia maka afetadu, nia prontu koopera ho Governu.

“Prezidente dehan, ha’u konkorda teb-tebes, inklui ha’u nia uma mós se Governu planu para atu sobu, la presiza fó indeminizasaun,’’ Samuel Marçal haktuir.

Samuel Marçal lori Governu nia naran, aviza hela ba maluk sira iha tasi-ibun ne’ebá, Governu sei halo alargamentu no konstrusaun jardim, sei alista komunidade no negosiante sira, la’ós sobu de’it, maibé sira ne’ebé negosiante sei prepara kondisaun di’ak liu, depois konstrusaun, sira bele tama fila-fali fatin sira ne’e kontinua sira nia negosiu.

Timor-Leste presiza halo dezenvolvimentu, tanba iha futuru Timor-Leste mós sei sai uma na’in ba Simeira ASEAN, ho nune’e, infraestutura sira iha nasaun ne’e tempu ona atu hadi’a.

Estátua Lafaek ne’e rasik halo iha Xina, bainhira remata sei haruka mai Timor-Leste liu husi Portugal.

Reportajen ekipa Rafa.tl