Governu Kontinua Suspende Atividade Arte-Marsiál to’o Juñu 2026

Governu Timor-Leste kontinua suspende atividade arte-marsiál to'o fulan-Juñu 2026. Imajen/Ilustrasaun

DILI, RAFA.tl– Konsellu Ministru, Kuarta (10/12/2025), aprova projetu Rezolusaun Governu nian ne’ebé hanaruk to’o loron 30 fulan-Juñu tinan 2026, períodu vijénsia suspensaun ba ensinu aprendizajen no prátika arte-marsiál sira no taka temporáriu fatin no instalasaun hotu-hotu ne’ebé destinadu ba ensinu aprendizajen no prátika arte-marsiál sira.

Iha komunikadu ofisiál ne’ebé Rafa.tl asesu husi Portal Governu, informa desizaun ne’e fó kontinuasaun ba Rezolusaun Governu nú. 45/2023, loron 10 fulan-Novembru, ne’ebé mak extende ona tutuir malu  hosi Rezolusaun Governu nú. 17/2024, loron 24 fulan-Abríl, nú.60/2024, loron 7 fulan-Novembru, nú. 22/2025,  loron 7 fulan-Abríl.

Presupostu sira ne’ebé justifika suspensaun ne’e vigora nafatin, liu-liu nesesidade atu hametin dame sosiál ne’ebé hetan ona dezde fulan-Novembru 2023 no atu garante katak prátika arte marsial sira sei bele halo de’it iha kontestu desportivu, hodi kontribui ba formasaun sívika no umanista ba joven sira.

Governu Konstitusionál da-IX, foin lalais ne’e, konklui prosedimentu lejizlativu hodi submete ba Parlamentu Nasionál proposta lei ida ne’ebé sei estabelese rejime jurídiku foun ba prátika arte-marsiál. To’o nia aprovasaun no tama iha vigór, nafatin nesesáriu kontinuasaun ba suspensaun no enseramentu temporáriu ba fatin sira ne’ebé destinadu ba ensinu, aprendizajen no prátika arte-marsiál sira.

Reportajen ekipa Rafa.tl