Governu Kompromete Apoia Atleta Difisiénsia Tilun iha Timor-Leste

MSSI kontinua apoia atleta difisiénsia tilun sira iha Timor-Leste atu bele krese no ativu liután iha modalidade desportu.

Díli, 27 Setembru 2026 (RAFA)- Governu liu husi Ministériu Solidariedade Sosiál no Inkluzaun (MSSI) kontinua apoiu atleta difisiénsia tilun sira iha Timor-Leste atu bele krese no ativu liután iha modalidade desportu.

Vise-Ministra Solidariedade Sosiál no Inkluzaun, Céu Brites, Domingu-ne’e, hato’o nia deklarasaun  bainhira partisipa iha aprezenta dokumentáriu kona-bá atleta difisiénsia tilun na’in-tolu husi Timor-Leste ne’ebé partisipa iha kompetisaun Deaflympics ba ema ho difisiénsia tilun iha Tokyo, Japaun iha Novembru 2025.

Atleta na’in-tolu ne’ebé partisipa iha eventu refere mak Domingos Freitas Belo, Abrão Gusmão no atleta ida seluk, ne’ebé reprezenta Timor-Leste iha área badminton.

Vise-Ministra Céu Brites, afirma katak ema ho difisiénsia tenke hetan apoiu no oportunidade hanesan membru seluk iha sosiedade, liuliu iha área desportu.

Vise-Ministra ne’e konsidera oportunidade ida-ne’e hanesan pasu importante atu hatudu katak ema ho difisiénsia mos iha kapasidade no parte importante husi sosiedade.

“Nu’udar membru Governu, ha’u sente kontente ho oportunidade ne’ebé fó ba atleta na’in tolu atu bele partisipa iha Olimpic ba ema ho difisiénsia tilun iha área badminton,” hatete Vise-Ministra Céu Brites.

Governante ne’e mós hato’o apresiasaun ba Fundasaun Nippon ne’ebé apoia no produz filme dokumentáriu kona-bá partisipasaun atleta Timor-Leste sira iha Tokyo ho durasaun filmazen oras ida liu minitu 17.

Tuir membru Governu ne’e, filme dokumentáriu ne’e bele sai instrumentu importante atu inspira no enkoraja ema ho difisiénsia sira, liuliu juventude, atu partisipa liután iha atividade desportiva.

Nia subliña katak kooperasaun entre Timor-Leste no Japaun, inklui ho organizasaun na’in sira, bele kontinua fó oportunidade ba ema ho difisiénsia atu dezenvolve sira-nia kapasidade.

“Ita tenke servisu hamutuk liután atu fó tan oportunidade ba ita nia maluk ho difisiénsia sira atu bele partisipa barak liután iha atividade desportiva,” tenik nia.

MSSI  liu husi diresaun ne’ebé foka ba ema ho difisiénsia no Sentru Reabilitasaun, sei kontinua servisu hamutuk ho asosiasaun ema ho difisiénsia, organizasaun naun-governamentál (NGO) no parseiru sira atu apoia no hadi’a kondisaun moris ba ema ho difisiénsia.

Vise-Ministra MSSI Céu Brites mós agradese ba asosiasaun no organizasaun sira ne’ebé durante ne’e servisu hamutuk ho Governu atu promove inkluzaun no fó oportunidade ba ema ho difisiénsia. No hein katak esperiénsia atleta na’in tolu iha Tokyo bele sai ezemplu ba ema ho difisiénsia sira iha Timor-Leste atu aumenta sira-nia partisipasaun iha desportu no atividade sosiál sira.

Jornalista: Davilio Valdamir/ Domingos Bere