Governu Husu LFTL Organiza Liga Époka 2026 To’o Dezembru

Jogu Liga Timorense Époka 2026. Imajen/LFTL

Díli, 22 Maiu 2026 (RAFA.tl)- Governu liu husi Ministériu Juventude, Desportu, Arte no Kultura (MJDAK), husu ba Orgaun Liga Futeból Timor-Leste(LFTL) atu mantein organiza liga époka ne’e to’o fulan-Dezembru hodi anima adeptu sira no kontribui ba prestasaun jogadór sira nian ba iha selesaun nasionál Timor-Leste.

Notísia Relevante: Jogu Abertura Liga Timorense Époka 2026, Karketu Díli F.C Rekolla Vitória Da-huluk Kontra As Marca ho Skor 4-2

Ministru Juventude, Desportu, Arte no Kultura (MJDAK), Nelio Izaac Sarmento, hato’o lia hirak ne’e hafoin akompaña direita jogu abertura Liga Timorense époka 2026, entre Karketu Díli F.C ho As Marca iha Estádiu Munisipál Díli, Kinta (21/05/2026).

“Ida ne’e mak apoiu governu nian ba liga Futeból ba époka 2026, ha’u espera katak  hahú jogu ida ne’e, adeptu klubu sira  sei mai rame liután,  ho koordenasaun ho Federasaun Futeból Timor-Leste, (FFTL) ,ita hanoin sira bele intende malu ho di’ak, no ita bele melora ita nia liga ne’e. Ha’u espera katak  depois ita simu liga halo didiak para nia durasaun ne’e bele naruk oituan. Ohin, hau mos bisu-bisu oituan ba  prezidente liga atu haré asuntu ida ne’e,” Ministru Nelio Izaac Sarmento informa.

Governante ne’e hatutan parte Governu mós sei kontinua halo komonikasaun ho órgaun liga hodi buka hatene dezafiu no razaun sira ne’ebé orgaun liga infrenta hodi buka solusaun hamutuk ba Futeból iha Timor-Leste.

“Ha’u sei husu  ba órgaun liga, tanbasá hanesan ne’e, tanbasá hanesan ne’ebá, karik sira iha razoens, ha’u labele adianta fó esplikasaun buat ne’ebé sira infrenta, depois ita haré situasaun, tanba agora mós ita hare krize mundiál impaktu mós ba ekonomia, buat sira ne’e hotu,” nia tenik.

Iha fatin hanesan Prezidente Liga Futeból Timor-Leste, Ipolito Soares hateten daudaun ne’e óragaun liga iha dezafiu boot ba finanseiru, maibé iha esperansa hodi buka meus atu kompleta liga ba époka ne’e ho segunda volta

“Liga ne’e ita presiza joga full, home no away, signifika iha jogu 90, maibé liga sei esforsu aan, presiza mós asistensia Governu nian, espesial ba finansiamentu  para  ita bele halao liga ne’e segunda volta tan, depois de primeiru volta ita bele kontinua. Ida ne’e mak ita nia esperansa. Ita nia problema boot mak finanseira, maibé ita esforsu atu governu nafatin apoiu bele halo jogu kompleta 90 jogu,” Ipolito Soares esplika.

Liga Timorense époka ne’e, Governu liu husi MJDAK fó apoiu orsamentu hamutuk $500,000.00 hodi finánsia liga no hamoris atividade desportu iha rai-laran.

Jornalista: Marito da Costa/Editór: Vito Salvadór