Governu Hatuur Fatuk Dahuluk Ba Konstrusaun Edifísiu Kuartél Jerál PNTL ho Kustu US$13,228,909,78

Dezeñu edifisiu Kuartel Jerál PNTL iha Caicoli, Dili. Imajen/Rafa.tl

DILI, RAFA.tl- Primeiru-Ministru (PM), Kay Rala Xanana Gusmão akompaña husi Ministru Interiór (MI), Francisco da Costa Guterres, Komandante Jerál Polísia Nasionál Timor-Leste  (PNTL), Komisáriu Jerál Polísia Henrique da Costa no Embaixadora Xina ba Timor-Leste, Wang Wengli hamutuk entidadade seluk tan, Kuarta (12/11/2025), hatuur fatuk dahuluk ba  konstrusaun edifísiu  Kuartél Jerál PNTL iha Caicoli, Dili.

Konstrusaun ba edifísiu Kuartél Jerál PNTL foun ne’e, ho orsamentu US$13, 228,909,78, no obra ne’e rasik sei ezekuta husi empreza Shanghai Construction Group Co, Ltd husi Xina.

Durasaun ba obra konstrusaun edifísiu Kuartél Jerál PNTL ne’e tinan rua no sei remata iha fulan-Outubru tinan 2027.

Ministru Interiór, Francisco da Costa Guterres lori Primeiru-Ministru Kay Rala Xanana Gusmão nia naran, agradese ba entidade hotu ne’ebé servisu hamutuk hodi dudu prosesu tomak, ikus mai konsege halo edifísiu foun ba PNTL.

“Ha’u lori Primeiru-Ministru nia naran hakarak hato’o agradese ua’in ba instituisaun sira hotu ne’ebé maka ajuda tebes Ministériu Interiór liuhosi PNTL, liu-liu bele rezolve tiha problema ida ne’e hodi ita bele hahú fali konstrusaun foun ba edifísiu foun PNTL. Edifísiu ida-ne’e sei sai hanesan símbolu ida hodi PNTL sira servisu ho profisionál ho dixiplina,”  Francisco da Costa Guterres hateten.

Ministru Interiór ne’e hatutan, Governu sei kontinua tau orsamentu hodi bele harí edifísiu PNTL ho kualidade hodi PNTL hotu bele halo sira-nia servisu ho dignu.

Governante ne’e esplika, maske dezeñu ba edifísiu Kuartél Jerál PNTL foun, hahú kedas iha 2014 to’o 2017, maibé iha 2020 Governu halo lansamentu hodi hatúr fatuk dahuluk ba konstrusaun edifísiu Kuartél Jerál PNTL.

Iha 2021  hahú, maibé difikuldade uitoan iha ai-riin fundasi ba konstrusaun nian, entaun  la konsege halo no dezde iha 2023  re-dezeña fali edifísiu Kuartél Jenerál PNTL no ohin a komesa halo lansamentu.

Ministru Interiór ne’e lori Governu nia naran agradese ba kompañia Shanghai, apezar iha problema lubuk boot kuaze tinan ualu, agora ba oin konstrusaun komesa fila- fali.

Governante ne’e, husu ba parte hotu atu kolabora ho empreza, nune’e aselera konstrusaun edifísiu Kuartél Jerál PNTL ho di’ak.

Nia informa, antes Primeiru-Ministru Kay Rala Xanana Gusmão fila fó hateten hela ba  katak, husu parte hotu, atu  apoiu empreza ne’e hodi aselera konstrusaun edifísiu Kuartél Jerál PNTL bele la’o di’ak.

Iha fatin hanesan Embaixadora Xina ba Timor-Leste Wang Wengli hateten, ho prezensa Primeiru-Ministru Xanana Gusmão nian iha lansamentu projetu ida ne’e espera projetu ida ne’e bele la’o ho susesu.

“Ha’u agradese no onra ida bele partisipa iha lansamentu projetu konstrusaun edifísiu Kuartél Jerál PNTL, Ha’u hakarak hato’o agradesimentu kle’an no ha’u espera katak konstrusaun ida ne’e bele la’o di’ak,” nia agradese.

Embaixadora Xina afirma empreza Shanghai Construction Group nu’udar empreza ne’ebé husi Xina ne’ebé kaer ona projetu boot iha Xina, servisu ho Governu lokál hodi halo konstrusaun barak no konstrusaun ne’ebé empreza halo, kualidade.

Komandante Jerál PNTL Komisáriu Jerál Polísia Henrique da Costa, agradese ba Primeiru-Ministru Kay Rala Xanana Gusmão, tanba bele marka prezensa iha serimónia hatúr fatuk dahuluk ba konstrusaun edifísiu Kuartél Jerál PNTL.

“Lori Polísia Nasionál Timor-Leste hanesan Komandante Jerál no Segundu Komandante Jerál nia naran ofisiál superiór sira hotu no membru sira hotu ami hato’o bem-vindu ba Primeiru-Ministru, no konvidadu sira hotu bele soe hela imi nia tempu tau fatuk dahuluk ba konstrusaun edifísiu Kuartél Jerál PNTL”, nia dehan.

Tuir Komisáriu Jerál Polísia katak, serimónia ida hanesan ne’e halo mós iha 2020 iha VIII Governu konstitusionál maibé la konsege realiza konstrusaun, maibé ida ne’e hanesan oportunidade di’ak hodi marka istória ba Polísia Nasionál Timor-Leste hodi hatúr fatuk dahuluk ba konstrusaun edifísiu Kuartél Jerál PNTL.

Reportajen ekipa Rafa.tl