Governu Halo Trial Ba Daruak Liña Fibra Ótika Ba Operadór Telekomunikasaun Sira

Governu liuhusi Ministériu Transporte no Komunikasaun halo trial ba daruak liña fibra ótika, Domingu (01/02/2026). Imajen/Rafa.tl

DILI, RAFA.tl – Governu liuhosi Ministériu Transporte no Komunikasaun (MTK), Domingu (01/02/2026), hala’o trial out ba daruak nian ba liña internet fibra ótika ba operadór telekomunikasaun Timor Telecom, Telkomcel ho Telemor.

Notísia Relevante: Governu Hahú Halo Trial Ba Kábu Submarinu husi Austrália no Sei Distribui Komersialmente iha 2026

Trial out fibra ótika dahuluk ne’e iha loron 25 fulan-Fevereiru tinan 2025 hodi halo koneksaun ba liña internet ba instituisaun Estadu Timor-Leste nian sira. Nune’e, trial ba daruak ne’e, halo teste operadór  telekomunikaun Timor Telecom, Telkomcel ho Telemor.

“Hahú  Sábadu kalan (31/01/2026), tékniku sira konfigura sasán hamutuk ho tore sira,” Ministru Transporte no Komunikasaun, Miguel Marques Gonçalves Manetelu hateten iha lansamentu trial ba daruak ba liña fibra ótika iha cable landing station (CLS) Bebonuk, Díli.

Ministru Miguel Marques Gonçalves Manetelu  informa durasaun ba teste ne’e tenke garante katak prontu duni halo servisu.

Kona-bá volume internet ne’e, Ministru Miguel Manetelu hateten Cabo Timor-Leste, Empreza Públika (CTL,E.P) sosa  uluk ho kuantidade 10 giga bite (GB) hodi responde ba iha servisu trial ninia hahú husi tinan 2025 to’o agora.

Ministru Miguel Manetelu argumenta bainhira internet ne’e tama ona iha merkadu depende fali ba utilizasaun rede operadór telekomunikasaun sira hakarak atu sosa kustu hira maka bele responde ba nesesidade operadór telekomunikasaun nian hafoin rede operadór sira ne’e identifika ona sira nia presu maka governu liu husi CTL,E.P bele hola iha Austrália.

“Ita sosa tiha reserva ba ita,13,5 terra bite (TB) mais ne’e ita la hola dala ida, ita hola tiha mai uza iha ne’e la to’o governu lakon ita mós sosa ba iha ne’e depois CTL,E.P  hatutan fali ba operadór sira no mós liu husi Diresaun Nasionál Komunikasaun ( DNIC) oferese ba instituisaun Estadu,” Miguel Manetelu informa.

Nia hateten governu nia esperansa ba fibra ótika ida ne’e hanesan infrastrutura bazika ida ba dijitalizasaun  (internet). Tanba ne’e,  setór sira hanesan Saúde, Ekonomia, Edukasaun, Agrikultura no setór sira seluk, bele aproveita másimu hodi halo investimentu ruma molok liña internet ne’e funsiona.

Ministru Miguel Manetelu husu ba setór sira iha área oi-oin atu aproveita másimu hodi halo dezenvolvimentu ba servisu iha área refere no MTK mós kontinua prepara kondisaun sira oinsá maka atu funsiona di’ak setór idak-idak nia servisu.

Reportajen ekipa Rafa.tl