Governu Ezonera Elizeu Isaac Fernandes no Hatudu Rosário da Graça Maia Ba Prezidente Konsellu Administrasaun RTTL, E.P

Rosário da Graça Maia, Prezidente foun RTTL,E.P ho mandatu tinan haat (2026-2030). Imajen/Espesiál

DILI, RAFA.tl –Konsellu Ministru, Tersa (27/01/2026),  aprova projetu Rezolusaun Governu ne’ebé aprezenta hosi Ministru Prezidénsia Konsellu Ministrus, Agio Pereira no Sekretáriu Estadu Komunikasaun Sosiál, Expedito Dias Ximenes, ne’ebé determina ezonerasaun ba atuál Prezidente Konsellu Administrasaun Rádiu no Televizaun Timor-Leste, EP (RTTL, EP), Elizeu Isaac Fernandes  no hatudu (nomeia) Rosário da Graça Maia hodi assume Prezidente foun RTTL,E.P ho mandatu tinan haat (2026-2030).

Nomeasaun ne’e prodús efeitus hahú loron 01 fulan-Fevereiru tinan 2026 no bazeia ba imparsialidade, integridade, kapasidade téknika no jestaun Prezidente foun nian, no mós ninia esperiénsia profisionál no senioridade ne’ebé hetan rekoñesimentu.

Informasaun ne’ebé durante ne’e sai viral iha mídia katak prezidente ezoneradu Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes, hetan ezonerasaun tanba konsidera hala’o knaar inkompativel ho Dekretu-Lei nú.42/2008, 20 Novembru no nia alterasaun dahuluk iha loron 24 fulan-Outubru 2024, kona-bá transforma RTTL,E.P.

Dekreitu-lei 42/2008, artigu 13 numéru 1 aliña b-c, kontempla kona-bá Prezidente Konsellu Administrasaun RTTL,E.P, labele sai dirijente iha partidu polítika. Nune’e, iha númeru 4  haktuir mós katak Prezidente Konsellu Administrasaun  RTTL,E.P  durante nia mandatu, la bele okupa  kargu ka profisaun seluk, exetu ba knaar sira hanorin nian iha tempu parsiál. Maibé, iha loron 27 fulan-Dezembru tinan 2025, Elizeu Isaac Fernandes,  simu tomda de posse iha  sede nasionál partidu CNRT  iha loron 27 fulan-Dezembru tinan 2025, nu’udár Primeiru Vise-Sekretáriu Ezekutivu Organizasaun Juventude  Partidu CNRT  Munisípiu Díli.

Reportajenekipa Rafa.tl