Governu Aproxima ADB ho BM Husu Empréstimu Ba Konstrusaun Estrada Ermera

Komdisaun estrada balun husi Gleno ba Ermera iha tempu udan. Imajen/Foti husi Facebook

DILI, RAFA.tl- Governu Timor-Leste, liu husi Ministériu Obras Públika (MOP) nafatin halo aproximasaun ho Asian Development Bank (ADB) no Banku Mundial (BM) hodi husu empréstimu atu finansia estrada Munisípiu Ermera.

Notísia Relevante: Governu TL ho ADB Asina Akordu Empréstimu no Subvensaun Projetu Estrada Iliomar no Ponte entre Baucau ba Lautém

Ministru Obras Públika (MOP), Samuel Marçal, ba jornalista sira iha Salaun Auditóriu Ministériu Finansas, Aitarak-Laran, Dili, Segunda (15/12/2025) hatete, komunidade tenke pasiénsia hodi hein prosesu, governu kontinua aproxima ho ADB hodi husu empréstimu.

Nia haktuir dalabarak públiku intende sala kona-bá prosesu aprovizionamentu, no prosesu ida dau-daun ne’e iha ona Komisaun Nasionál Aprovizionamentu (CNA, sigla portugés), la’os iha Obras Públika.

“Dalaruma ema husu, ema hanoin dehan Obras Públika, mós dalaruma akompaña iha mídia, Obras públiku ne’e kabén-boot, Obras Públika maka la tau interese, maibé hanesan governu koko atu komprende komunidade sira, tanba komunidade sira menus komprende ba iha prosesu sira,” Ministru Samuel Marçal hateten.

Samuel Marçal esplika, prosesu estrada diresaun Gleno ba Ermera dau-daun ne’e prosesu la’ós iha Ministériu Obras Públika maibé prosesu ne’e iha Komisaun Nasionál Aprovizionamentu (CNA).

Estrada Diresaun Gleno ba Ermera ne’e, Ministériu Planeamentu Investimentu Estratéjiku (MPIE)  preokupa, maibé Obras Públika preokupa liu tanba ida ne’e programa MOP nian. Governu kontinua toma nota ba komunidade nia preokupasaun, tanba liga ho realidade estrada komunidade mos iha obrigasaun hodi halo ejijensia ba sira nia direitu.

Governu mós kontinua tenta ho Asian Development Bank (ADB)  hodi husu empréstimu atu rezolve preokupasaun komunidade nian.

“Ami mós preokupa teb-tebes, kalan-loron kontaktu nafatin, husu nafatin Banku Mundial no ADB oinsá atu responde lalais, ohin ha’u ko’alia uituan ho Ministra Finansas, ami hotu servisu maka’as,” Nia esplika.

Liga ho estrada Ermera, Rafa.tl kontaktu direta ho Ministru Planeamentu Investimentu Estratéjiku (MPIE) Gastão de Sousa via telefónika hodi konfirma asuntu ne’e, maibé Ministru responde katak, la iha tempu atu resposta.

“Husu ba Obras Públika, ha’u servisu barak, depois maka ita ko’alia,” Ministru Gastão de Sousa hateten liu husi telefone.

Governu mós kontinua enkoraja populasaun Munisípiu Ermera atu pasiénsia hodi hein prosesu sira tanba buat hotu rezolve tuir lei, tanba ne’e komunidade nia pasiénsia ne’e hanesan kontribuisaun hodi hametin sistema empréstimu.

Reportajen ekipa Rafa.tl