Governu Aprova Rezolusaun Ba Promove Utilizasaun Tais iha Loron Servisu

Feto-maluk sira produs tais hanesan tradisaun no identidade Timoroan nian. Imajen/Ann Turner/USAID nia Projetu Turizmu ba Ema Hotu

DILI, RAFA.tl– Konsellu Ministru aprova projetu Rezolusaun Governu, ne’ebé aprezenta husi Sekretáriu Estadu Arte no Kultura, Jorge Soares Cristovão, hodi promove utilizasaun tais Timor-Leste nian.

Iha komunikadu ofisiál ne’ebé Rafa.tl asesa husi Portal Governu, Kuarta (10/12/2025), hatete, rezolusaun ida-ne’e ho objetivu atu reforsa valorizasaun ba elementu sentrál ida hosi identidade kulturál imateriál timoroan nian, ne’ebé rekoñese hosi UNESCO no iha abut ne’ebé metin iha rituál komunitáriu sira, nune’e mós iha atividade ekonómika no sosiál nasaun nian.

Diploma ne’e determina katak órgaun no servisu administrasaun públika sira promove uzu tais iha loron servisu dahuluk kada fulan, no enkoraja dirijente no xefe sira atu uza vestuáriu ne’e iha aktu ofisiál no serimónia públika sira. Governu mós apela ba sosiedade sivíl no setór privadu sira atu hamutuk no enkoraja sira-nia funsionáriu atu uza tais semana ida dala ida, hodi kontribui ba prezervasaun no divulgasaun.

Rezolusaun ne’e prevé mós kriasaun komisaun multidixiplinár ida hodi dezenvolve rejime sertifikasaun no autentisidade ba tais, nune’e mós rekualifikasaun ba Merkadu Tais nian iha Díli, hodi bele valoriza artezanatu sira-nia servisu no reforsa potensiál kulturál no turístiku espasu ida-ne’e nian.

Reportajen ekipa Rafa.tl