Governu Alerta Ba PNTL Mantein Vijilansia Másimu iha Liña Fronteira

Ministru Interiór, Francisco da Costa Guterres. Foto/Rafa.tl

DILI, RAFA.tl– Ministru Interiór (MI), Francisco da Costa Guterres, nafatin alerta ba Polísia Nasionál Timor-Leste (PNTL), Unidade Polísia Marítima (UPM), Unidade Patrullamentu Fronteira (UPF), no mós ekipa  sekreta sira, halo vijilansia  másimu iha liña fronteira sira hodi kombate tranjaksaun ilegál ne’ebé fó prejuizu no amiasa ba vida Estadu nian.

Notísia Relevante: PNTL Asegura Sigaru Marlboro Ilegál Karton 389

Ministru Francisco da Costa Guterres fó alerta ne’e hafoin iha Segunda (06/10/2025),  Komandu PNTL Munisípiu Covalima  asegura sasan ilegál hanesan sigaru karton 389 iha área tasi ibun iha Aldeia Coloama, Suku Kasabauk, Postu Administartivu Tilomar, Munisipiu Covalima no mós sidadaun estranjeiru na’in-rua ne’ebé hatama kila-manu ilegál mai Timor-Leste.

“Fronteira ne’e ita kontrola hela ho másimu, se ita la kontrola karik iha Suai ne’e ita kaer la hetan, tanba kontrola ne’e mak ita konsege kaer tanba ita kontrola efetivu iha ne’ebá mak kaer. Ilegal ne’e lor-loron tama, ita konsege hapara buat barak, dalabarak ne’e ita dehan labele fó sai para ita mantein vijilansia,” Ministru Interiór Francisco da Costa Guterres hateten hodi hatan jornalista sira iha Palásiu Governu, Kuarta (08/10/2025).

Governante ne’e hatutan, autoriedade seguransa ne’ebé koloka iha liña  fronteira nafatin halo kontrolu ba fatin sira ne’ebé deskonfia sempre akontese tranjaksaun ielegal sira.

Nia afirma mesmu iha difikuldade no limitasaun balun ne’ebé ekipa PNTL enfrenta, maibé kontinua servisu ho dedikasaun hodi asegura Timor-Leste livre husi tranjaksaun ilegál sira.

Daudaun ne’e Polísia asegura ona evidénsia sigaru ilegál ne’e ba iha PNTL Munisípiu Covalima hodi intrega ba Ministeriu Publiku, no móa hodi hein despaixu husi Ministeriu Públiku atu asegura sidadaun sira ne’ebe importa sigaru ne’e.

Kona-ba sidadaun estranjeiru na’in-rua ne’ebé hatama kilat-manu ilegál, PNTL liuhosi Eskuadra Polísia Dom Aleixo, Dili, asegura ona hodi hein ba prosesu tuir mai.

Notísia Relevante: Hatama Kilat-Manu Ilegál, PNTL Asegura Sidadaun Estranjeiru Na’in-rua

Reportajen ekipa Rafa.tl