Golu Rua Husi Mbappé ho Dembélé Lori Fransa Ba Meia-Finál Kopa Mundiál 2026

jogadór estrela na’in-rua husi ekipa Les Bleus (Fransa), Kylian Mbappé no Ousmane Dembélé. Imajen/Reuters

Díli, 10 Jullu 2026 (RAFA.TL)- Selesaun Franseza asegura fatin ida iha meia-finál Kopa Mundiál 2026  hafoin halakon Maroko ho score 2-0 iha jogu kuartu-finál, iha Estádiu Boston, Estadus Unidus, Sesta-ne’e.

Vitória ekipa selesaun Fransa (Les Bleus) mai husi golu rua ne´ebé marka husi jogadór estrela na’in-rua, Kylian Mbappé no Ousmane Dembélé iha segunda parte.

Iha jogu ekipa Les Bleus ameasa dezde inísiu jogu nian. Suta maka’as ida hosi Mbappé iha minutu datoluk sei bele salva husi guarda rede Maroko nian.

Ekipa Fransa kontinua lansa ameasa no atake sira ne’ebé perigu ba Maroko iha minutu dahuluk sira no kabesa ida hosi Dayot Upamecano hafoin suta kantu ida halo Maroko iha risku, maibé guarda reze Maroko sei bele antesipa ho di’ak loos.

Fransa hetan penalidade iha minutu 25 hafoin jogadór Maroko Noussair Mazraoui hamu Mbappé iha kaixa penalti nian, maibé no Mbappé ezekuta falla hodi marka golu tamba nia suta baixu ba kantu karuk laiha forsa no guarda rede Bounou ho fasil salva bola ne’e. Ekipa rua mantein  jogu to’o intervallu ho score 0-0.

Tama ba jogu segunda parte, ekipa Les Bleus kontinua domina jogu no halo atake maka’ás ba adversároiu, maibé Guarda Rede Maroko nian mantein hatudu performa di’ak hodi salva bola ameasa sira.

Maroko tenta sai husi presaun hodi halo jogu no lansa kontra atake maibé Fransa mantein sira nia intensidade atake nian. Mbappé ikus mai marka golu ba nia ekipa iha minutu 60 hodi muda score ba 1-0.

Fransa aumenta tan golu ida iha minutu 66 liu husi Dembélé hodi muda score ba 2-0 no golu ne’e hanesan lori presaun másimu ba adversáriu.

Maroko tenta atu aproveita tempu ne´ebé iha ho oportunidade di’ak liu hosi Azzedine Ounahi nia suta iha minutu 82, maibé Mike Maignan konsege hapara esforsu ne’e.  Ho nune’e too apitu finál lian, ekipa Les Bleus nafatin lidera ho score 2-0.

Fransa sai hanesan ekipa dahuluk ne’ebé maka avansa ba meia-finál Kopa Mundiál 2026 nian. Les Bleus sei hein atu hasoru ekipa ida husi manán nain entre España ho Béljika hodi determina fatin ida ba finál. Enkuatu ekipa selesaun Maroko tenke fila husi Kopa Mundiál 2026 iha Kuartu-Finál.

Jornalista: David Gonçalves/Editór: Vito Salvadór