Golu husi Maximilian Araujo Salva Uruguai Husi Derrota Kontra Arábia Saudita

Jagodór sira husi Urugai ho Arábia Saudita hadau malu bola iha kampu klaran iha jogu Tasa Mundiál, Tersa 16 Juñu 2026. Imajen/goal.com

 Díli, 16 Juñu 2026 (RAFA.TL)– Golu husi Maximilian Araujo iha minutu 80 salva Uruguai husi derrota kontra Arábia Saudita, iha jogu kontinuasaun Kopa Mundiál, faze apuramentu grupu H.

Joga iha Estádiu Hard Rock, Miami, Tersa (16/06/2026), Uruguai foti inisiativa hosi inísiu hodi lansa kedas atake ba  nia adversáriu Arábia Saudita.

Tama ba minutu 30, Uruguay hetan oportunidade liu husi nia jogadór Federico Vinas nia kabesa ho bola kruzamentu ne’ebé pasa husi Araujo, maibé Mohammed Al Owais sei bele blokeia bola oportunidade ne’e.

Arábia Saudita halo surpreza ida iha minutu 41, jogadór Abdulelah Al Amri lansa golu ida ba Uruguai hafoin aproveita bola iha baliza oinno muda score ba 1-0.

Hafoin golu ne’e, Uruguai tenta atu lansa kontra atake ne’ebé lais,  maibé laiha resposta to’o apitu iha intervallu.

Tama ba segunda parte, Uruguai halo presaun maka’ás liután ba Arábia Saudita. Iha minutu 60, Manuel Ugarte iha oportunidade atu hatama golu ba Arábia Saudita, maibé nia suta kona poste.

Ho jogu ne’ebé iha, Uruguai domina kompletamente jogu sira no lansa atake barak ba Arábia Saudita.

Ho oportunidade ne’ebé iha Uruguai ikus mai  jogadór Maximiliano Araujo marka golu ida hafoin aproveita bola sai husi  Federico Vinas nia kabesa hodi muda score ba 1-1.

Golu ida-ne’e halo jogadór Uruguai sira entusiazmu liután no kontinua halo presaun ba adversáriu, maibé laiha golu ruma,

Tama ba tempu estra segunda parte nian, Federico Valverde iha oportunidade atu hatama golu, maibé baliza Arábia Saudita Owais sei salva no asegura nia rede husi bola.

Ho rezultadu 1-1, halo ekipa sira iha grupu H iha konkursu ne’ebé maka’ás, tanba ekipa hotu-hotu hetan pontu ida no seidauk iha ekipa ne’ebé rekolla vitória.

Jornalista: Davilio Valdemir/Editór: Vito Salvadór