Gally Freitas Sei La Reforsa Selesaun Nasionál iha Asian Hyundai Cup 2026

Jogadór estrela Timor-Leste Paulo Domingos Gally. Freitas

Díli, 25 Juñu 2026 (RAFA.TL)- Treinadór Prinsipál Selesaun Nasionál Timor-Leste, José Pedro Alves Salazar, fó sai ona lista jogadór hamutuk 24 ne’ebé sei reforsa selesaun nasionál iha kompetisaun Asian Hyundai Cup 2026. Iha lista ne’e jogador sira-ne’e la inklui jogadór estrella Timor-leste Gally Freitas tanba sofre leizaun.

Treinadór Prinsipal Selesaun Nasionál José Pedro Alves Salazar ba jornalista sira liu husi konferensia ba imprensa, iha Federasaun Futeból Timor-Leste (FFTL), Díli, Kuarta (24/06/2026), hateten, jogadór estrela Timor-Leste Paulo Domingos Gally Freitas sei la haforsa selesaun nasionál iha jogu Asian Hyundai Cup 2026 tanba kondisaun la permite ka sofre hela lezaun ne’ebé sei presiza atensaun no tempu rekuperasaun.

Nia argumenta eis-jogadór AD SLB Laulara no Karketu Dili FC, ne’ebé agora joga ba klubu Persebaya Indonézia, sofre lezaun iha ain tuur. Kondisaun ne’e halo nia labele integra lista finál Selesaun Nasionál ba Asian Hyundai Cup 2026.

“La’ós de’it Gally mak la tama iha lista selesaun, maibé jogadór balu seluk mós la iha. Ba kestaun Gally, depois de play-off remata, nia aprezenta karta médiku hosi klubu Indonézia  no Federasaun mós publika ona informasaun kona-bá lezaun ne’ebé nia hetan,” José Pedro Alves Salazar informa.

Lezaun ne’e iha risku atu agrave tan karik kontinua joga tanba kalendáriu kompetisaun ne’ebé todan, tanba iha jogu haat iha tempu badak. Ho diferensa loron tolu de’it entre jogu sira.

“Ha’u haré liubá grupu no haré liubá jogadór sira ne’ebe seidauk pursentu 100 rekupera husi nia aleiza. Ita hakarak fó prioridade ba jogadór sira ne’ebé iha kondisaun fit pursnetu 100 atu bele kontribui másimu ba ekipa nasionál,” Treinadór Prinsipal Selesaun Nasionál José Pedro Alves Salazar argumenta.

Iha parte seluk, Team Manager Selesaun Nasionál, Fernando Baptista Xavier, konfirma katak preparasaun ba jogu ne’e lao hela tuir planu ne’ebé prepara ona hosi ekipa téknika Selesaun Nasionál sei realiza treinamentu intensivu no Training Camp iha Malázia antes tama ba kompetisaun, atu hasa’e preparasaun tática no física ekipa.

“Hakarak fó hatene ba públiku katak ita-nia faze prepasaun iha ona koordenasaun ho parte diresaun selesaun nasionál. Ita-nia treinadór prinsipal hanesan  lider ba iha ekipa tékniku ne’e ita iha planu atu hahú ita nia perpasaun ne’e, ita sei mantein hanesan foin lalais ita halo iha faze play off,” Team Manager Selesaun Nasionál, Fernando Baptista Xavier informa.

Nia hatutan, Federasaun Futeból Timor-Leste halo ona  konvokatóriu ba selesaun nasionál hamutuk 26 ne’ebe jogadór balu mai ho oin foun.

Ba preparasaun, ekipa selesaun nasionál sei halo trening camp ida iha Malázia, atu nune’e, bele perpara ekipa ne’e ho di’ak antes infrenta jogu iha faze grupu.

Jornalista: Davilio Valdemir/Editór: Vito Salvadór