Fundu Petrolíferu Kontinua Sustenta Despeza Estadu

Governadór BCTL, Hélder Lopes. Imajen/Rafa.tl

DILI, RAFA.tl– Governadór Banku Central Timor-Leste (BCTL, sigla portugés), Hélder Lopes, konsidera Fundu Petrolíferu kontinua sai hanesan mákina prinsipál ba sustenta despeza estadu Timor-Leste nian, maibé hahú mós hetan apóiu ho reseita doméstika sira ne’ebé bele kobre área balun ba dezenvolvimentu sustentável país nian.

Governadór BCTL, Hélder Lopes, hateten iha esperansa reseita doméstika sei sustenta despeza Timor-Leste nian iha futuru, maske la kobre hotu, maibé bele ona hamenus dependénsia ba fundu minerais ne’ebé Timor-Leste iha.

Nia hatutan, fundu minerais nia dezempeñu investimentu kontinua la’o di’ak, no reseita doméstika sei ki’ik, maibé sei finansia ho fundu mina-rai, tanba ne’e reseita doméstika sei sustenta nasaun Timor-Leste nia ekonomia iha tempu naruk.

“Espera katak ita-nia fundu nia dezempeñu investimentu kontinua la’o di’ak, reseita ki’ik ne’e sei finansia ho fundu mina-rai, mas ba tempu naruk ita espera katak, reseita doméstika sei sustenta ita-nia ekonomia. Maske la tomak, maibé bele hamenus ona ita-nia dependénsia ba fundu mina-rai,” Hélder Lopes hateten.

Governadór Banku Central Timor-Leste ne’e dehan, kona-bá mobilizasaun reseita doméstika, ne’e kompeténsia Governu nian, kompeténsia BCTL nian mak oinsá kontribui no haré mobilizasaun reseita doméstika ne’e, tanba ne’e setór privadu no entidade sira hotu mai hamutuk hodi halo servisu ba hodi aumeta reseita.

“Sobre mobilizasaun reseita doméstika, ne’e kompeténsia Governu nian, agora saida mak  BCTL atu kontribui  mak, ami haré mobilizasaun reseita doméstika ne’e sei ki’ik, tanba ne’e mak entidade hotu tantu liu husi Governu, BCTL no setór privadu hotu-hotu sei mai atu oinsá bele espada ka ita bolu dehan espanda kapasidade ekonomia hodi  bele hetan impostu husi ne’ebá no aumenta reseita,” Nia dehan.

Governadór BCTL ne’e deklara, fundu petrolíferu iha trimestre datoluk fulan-Novembru nia dezempeñu ne’e diak, husi totál osan ne’ebé hetan husi investimentu ne’e governu seidauk dada hotu, ne’ebé hanoin katak dezempeñu ne’e di’ak, maibé sira sei relata nia númeru  ba públiku sira iha tinan ne’e nia rohan.

Reportajen ekipa Rafa.tl