FONGTIL Husu Ministériu Interiór ho Komandu PNTL Anula Lista Ajente Foun Na’in-400

Forum Organizasaun Naun-Governamentál Timor-Leste (FONGTIL) halo konferénsia imprensa, Sesta (06/02/2026). Imajen/Rafa.tl

DILI, RAFA.tl– Forum Organizasaun Naun-Governamentál Timor-Leste (FONGTIL) ejiji ba Governu liu husi Ministériu Interiór ho Komandu Jerál Polísia Nasionál Timor-Leste (PNTL), atu anula ba desizaun lista kandidatu ajente foun na’in-400 ne’ebé aprovadu ba teste médiku tanba deskonfia iha indísiu familiarizmu.

Notísia Relevante: Deskonfia iha Indísiu Familiarizmu, PDHJ Sei Halo Fiskalizasaun Ba Rezultadu Teste Kadetes PNTL

“Husu Ministériu Interiór no PNTL atu halo esklaresimentu ne’ebé loos kona-bá prosesu rekrutamentu kandidatu kadetes foun PNTL, husu Ministériu Interiór no PNTL imediatamente atu anula desizaun, hodi la fó de’it teste médiku ba kandidatu na’in-400, maibé fó oportunidade hotu ba kandidatu sira ne’ebé ho kategoria aprovadu, ho nune’e, la hamosu diskriminasaun iha prosesu rekrutamentu,” porta-voz FONGTIL, Esterlita Pereira, hateten  ba jornalista sira iha konferénsia imprensa, Sesta (06/02/2026).

FONGTIL husu mós ba PDHJ imediatamente atu halo investigasaun ne’ebé kle’an hodi hatene tendénsia ba prátika sira ne’ebé kontra prinsípiu Boa Governasaun.

FONGTIL husu ba Parlamentu Nasionál Komisaun B ne’ebé trata asuntu Negósiu Estranjeiru, Defeza ho Seguransa, atu halo fiskalizasaun ba prosesu rekrutamentu ne’ebé iha tendénsia kontra prinsípiu Boa Governasaun.

FONGTIL lamenta ho rezultadu ne’ebé Sekretariadu Komisaun  Rekrutamentu PNTL 2025 ne’ebé fó sai katak husi ajente ne’ebé hetan aprovadu hamutuk 10,597 maibé fó de’it oportunidade ba ajente foun na’in-400 hakat ba teste médiku.

“Husu ba Governu liu husi Ministériu Interiór no Komandu PNTL relasiona ho prosesu rekrutamentu ba membru foun PNTL iha tinan 2025. Timoroan barak mak konkore iha rekrutamentu refere no tuir hotu prosesu sira hanesan teste eskrita no fíziku liuhosi regulamentu ne’ebé estabelese husi Komisaun Rekrutamentu bazeia ba Diploma Ministeriál N.º 17/ 2025 de 25 de Junho Regulamentu do Concurso Público de Admissão ao Curso de Formação de Agentes da Polícia Nacional de Timor Leste,” porta-voz FONGTIL Esterlita Pereira afirma.

Esterlita Pereira esplika Komisaun Rekrutamentu PNTL liu husi porta-voz António da Luz, anúnsiu lista kandidatu kadetes foun ba públiku liu husi fontes mídia Nasionál sira iha Timor-Leste ho totál kandidatu 12.874. Husi númeru ne’e, kandidatu 10.597 mak aprovadu, no kandidatu 2.277 mak la aprovadu.

Nia hateten tanba haré husi kandidatu aprovadu sira ne’e  Komisaun Rekrutamentu deside katak iha kandidatu hamutuk 400 de’it maka sei tuir teste médiku. Kandidatu ho kategoria aprovadu sira seluk sei labele tuir. Husi teste médiku ne’e, karik identifikadu kandidatu balu neʼebé kondisaun saúde la permite mak sei kontaktu kandidatu seluk tuir lista ne’ebé iha.

Nia esplika ho desizaun ida ne’e la justu, diskriminativu no la garantia prátika prinsípiu boa-governasaun iha Timor-Leste. Tanba la hatán ba Diploma Ministeriál N.º 17/2025 de 25 de Junho hodi la hatán ba Artigu 42 alínea 1 husi Diploma ne’e rasik.

Ikus liu FONGTIL ho nia Membru sira nafatin deskonfia katak prátika sira ne’e hodi hatán de’it ba Artigu 37 alínea A no B ne’ebé fó prioridade ba Jerasaun Patriota no PNTL ativu nia oan mak bele liu. Maibé Diploma Ministeriál N.º 17/2025 de 25 de Junho Tribunál rekursu deklara ona Inkonstituisionál.

Relasiona ho FONGTIL nia ejijénsia ne’e, Rafa.tl halo konfirmasaun ho Porta-voz Sekretaridu Rekrutamentu PNTL foun 2025, Superintendente António da Luz, Sesta ne’e, liu husi WhatsApp maibé porta-voz ne’e responde katak Sekretariadu laiha kompeténsia atu fó resposta ba asuntu ne’e.

Forum Organizasaun Naun-Governamentál Timor-Leste (FONGTIL) nu’udar Mahon ba membru ONG lokál, nasionál no internasionál hamutuk 291 ne’ebé rejistradu iha Ministériu Justisa Timor-Leste hanesan organizasaun sosiedade sivíl ne’ebé halo servisu advokasia, fiskalizasaun no kontrolu sosiál ba garante Boa Governasaun iha país ne’e.

Reportajen ekipa Rafa.tl