Finál Taça Liga FFTL, Karketu Díli F.C Garante Mantein Títulu Kampiaun no Emmanuel F.C iha Ambisaun Halo Istória

Ekipa Karketu Díli FC. Imajen/Rafa.tl

DILI, RAFA.tl – Ekipa Karketu Díli F.C no Emmanuel F.C ne’ebé sei hasoru malu iha finál Taça da Liga FFTL, Sábadu (28/02/2026), iha Estádiu Munisipál Díli, sei sai hanesan jogu determinante kampaiun Taça da Liga époka ne’e.

Notísia Relevante: Karketu Díli F.C Hakat Ba Finál Taça da Liga Hafoin Halakon Assalam F.C ho Skor 3-2

Karketu Díli F.C iha ambisaun hakarak sai kampiaun  hodi mantein títulu kampiaun iha istória futeból Timor nian, nune’e Emmanuel F.C iha ambisaun ida determinadu  hakarak istória ba futeból Timor-Leste hodi manan Karketu Díli F.C.

Hanesan futeból mania Timor nia koñesimentu katak  klube matak malirin Karketu Díli FC sai ona kampiaun Liga Timorense iha epoka dala-haat; 2017, 2021, 2023, ho 2025.

Haré ba matéria jogadór, ekipa Karketu Díli F.C no Emmanuel F.C laiha diferensa boot, tanba ekipa rua ne’e maioria defende husi jogadór selesaun nasionál ne’ebé joga ba selesaun nasionál seniór no mós iha sub-23 inklui sub-19.

Karketu Díli F.C lidera husi  treinadór nasionál estranjeiru Bernard Taye no mós reforsa husi jogadór estranjeiru na’in-haat iha kualidade  iha liña avansadu ne’ebé sei sai hanesan ameasa boot ba adversáriu.

Emmanuel F.C ne’ebé lidera husi treinadór nasionál no mós hanesan lendáriu futebolista Timor-Leste nian ho naran koñesidu Ari no reforsa mós husi jogadór estranjeiru ida ne’ebé iha prestasaun di’ak atu tonka ka siga ekipa Emmanuel F.C nia ambisaun hakarak fuzila nia adversáriu Karketu Díli FC  hodi bele  marka istória sai ba kampiaun Taça da Liga FFTL.

Iha  predisaun ekipa Karketu Díli F.C sai hanesan ekipa favoritu ba kampiaun, haré ba ambisaun no preparasaun, inklui matéria jogadór ne’ebé ekipa matak malirin iha forte tebes atu realiza ambisaun mantein títulu kampiaun.

Durante kompetisaun hahú husi faze grupu to’o meiu-finál Taça da Liga, Karketu Díli F.C iha jogadór Olegar Malik Xavier “KAKA”  ne’ebé bele dehan sai  hanesan jogadór xave  sempre halo adversáriu sira atrapalla liu husi abilidade jogu ne’ebé nia iha. Aleinde ne’e, iha mós jogadór Alexandre Corsino no Daniel Gayo ne’ebé sempre halo kombinasaun ho pasajen sira  no sai mos hanesan mákina golu ba ekipa Karketu Díli F.C.

Haré ba matéria jogadór no preparasaun ne’ebé iha, Emmanuel F.C iha mós ambisaun hakarak marka istória. Iha liña klaran Emmanuel F.C lidera husi kapitaun ekipa Freteliano Santos ne’ebé mós hanesan jogadór selesaun nasionál, iha abilidade di’ak atu halo jogu no kontrola adversáriu nia ritmu.

Emmanuel F.C mós sempre halo atake lais husi liña avansadu iha parte karuk no loos liu husi jogadór Paulo Gusmão no Quintão ne’ebé ho abilidade kontra atake lais.

Iha preparasaun ba jogu finál Taça da Liga, treinadór ekipa Karketu Díli F.C, Barnard Teye rekoñese Emmanuel hanesan ekipa ne’ebé forte, tanba antes ne’e ekipa rua empata ona dala ida iha tinan kotuk, maibé sei esforsu maka’as hodi halakon Emmanuel no sai kampiaun ba Taça da Liga.

“Ekipa Emmanuel bele dehan ekipa ne’ebé di’ak, sira hatudu joga  mós di’ak, iha liga ami empata 0-0,  entaun ida ne’e sei sai futeból ida ne’ebé di’ak no furak, maibé ha’u mai atu manán,” Treinadór Bernard Taye afirma.

Jogadór Karketu Díli F.C, Olegar Malik Xavier “KAKA” garante hamutuk ho Karketu Díli F.C  hakarak marka istória foun iha faze finál Taça da Liga ne’e, hodi halakon Emmanuel F.C.

“Momentu liga foin dau-daun ne’e ami empata ho sira, maibé ha’u pesoal, ha’u laiha, tanba momentu ne’ebá ha’u ba Filipina no agora duni ami hakarak atu manán hodi foti Taça ida ne’e tanba Karketu sempre mai ho mentalidade ida to’o ona finál sempre foti Taça no Liga sira,” Olegar Malik Xavier hateten.

Asistente treinadór ekipa Emmanuel F.C, Van Basten hatete, maske Karketu Díli F.C nu’udar ekipa zigante, maibé Emmanuel preparadu no iha tékniku  balu ne’ebé la hafásil Karketu atu aguenta sira-nia ambisaun sai kampiaun.

“Ami nia preparasaun másimu, hein para atu batalla de’it iha finál iha Sábadu agora. Buat ida mak ita labele haluha katak, Dewi Fortuna ne’e sempre iha, loos duni ho istória ida ne’e hanesan mós pontu pozitivu ida mai ami nia jogadór no ekipa katak ami nia istória ne’e sei koko atu mantein,” Van Basten haktuir.

Kapitaun Emmanuel F.C, Freteliano Santos afirma, nia parte fó ona motivasaun ba ekipa no preparadu hodi kria istória foun ba Karketu iha jogu Finais Taça da Liga ne’e.

“Ba ami jogadór prontu atu kompete iha finál, liu-liu hasoru ekipa zigante hanesan Karketu, ita hatene Karketu ekipa fantástiku mai ho jogadór ne’ebé mak kualidade, maibé ida ne’e la hamonu ami nia vontade iha finál ida agora.  Ha’u nu’udar kapitaun, ha’u sei fó motivasaun ba kolega sira para bele halo istória foun iha jogu finál ida ne’e,” Freteliano Santos hateten.

Jogu finál Taça da Liga FFTL entre Karketu Díli F.C no Emmanuel F.C sei realiza iha Estádiu Munisipál Díli,  Sábadu, 28 fulan-Fevereiru 2026.

Notísia Relevante: Úniku Golu Husi Angenuku Viegas Lori Emmanuel F.C Hakat Ba Finál Taça da Liga

Reportajen ekipa Rafa.tl