FFTL Sei Realiza Copa FFTL Sub-15 ho Sub-17 Feto-Mane iha Munisípiu

reuniaun ho Asosiasaun Futeból Munisipál sira no ho Asosiasaun Profisionál sira iha salaun Xanana Sport Center, Sábadu (11/04/2026).

Díli, 12 Abríl 2026 (RAFA.tl)- Federasaun Futeból Timor-Leste (FFTL), deside re-ativa jogu futeból sub-15 iha munisípiu no Copa FFTL ba feto no mane, inklui sentru treinamentu juvenil iha tinan ne’e.

Notísia Relevante: Prezidente FFTL Promete Harii Kampu Futeból Dignu no Reabilita Estádiu Díli

Liu husi reuniaun ho Asosiasaun Futeból Munisipál sira no ho Asosiasaun Profisionál sira iha  salaun Xanana Sport Center,  Sábadu (11/04/2026), Sekretáriu Jerál FFTL, José Adilson C. Ribeiro, introdus  programa, atividade sira ne’ebé FFTL hamutuk ho nia membru asosiasaun sira atu halo iha tinan ne’e.

“Tinan kotuk ami implementa ona no tinan ne’e kontinuasaun. Ami mós deside  kontinuasaun Copa FFTL Sub-17 feto  no mane ne’ebe tinan kotuk mós ami halo ona, ne’e hanesan atividade kontinuasaun,” José Adilson C. Ribeiro hateten.

Sekretáriu Jerál FFTL ne’e hatutan, iha reniaun ne’e  koalia  mós  kona-bá apoiu  subsidiu ba membru asosiasaun munisipál sira, atu nune’e, bele eleva atividade iha munisipál sira.

“Tinan kotuk, ami iha kompromisu ida katak durante ne’e, membru asosiasaun sira servisu  voluntáriu entaun ami hanoin ona tau insentivu ida  ho fundu uitoan ba apoiu sira nia atividade  iha munisipiu.  Tinan uluk ita halo apoiu iha oin rua, apoiu ba administrasaun 40%, apoiu ba atividade 60%, maibe difikuldade barak tanba atividade barak demais dalaruma ita nia asosiasaun sira falla iha relatóriu, ne’ebé tinan ne’e ita muda,  ita halo apoiu ne’e iha faze hira kedas, apoiu ba atividade ne’e dala ida de’it, apoiu mensal  hanesan subsídiu ba sira nia direitu, apoiu ba administrasaun  ba edifisiu nian la’o kada fulan,” nia tenik.

Iha fatin hanesan Sekretáriu Jerál Asosiasaun Futeból Ermera, Mildades Gonzales Maia, hateten enkontru ne’e importante no iha rezultadu  pozitivu,  maibé nia parte husu ba FFTL atu  kontinua halao inkontru refere  kada  trimestral.

Nia hateten ho  reniaun sira hanesan ne’e bele responde ona dezafiu ne’ebe mak mosu iha munisípiu sira, pesoamente husi asosiasaun Futeból Ermera apresia tebes atividade sira ne’e, no espera iha futuru atividades reniaun sira hanesan ne’e karik posivel labele halao  deit tinan ida dala ida, maibé bele mós trimestral.

Nia argumenta,  ho anunsiu ne’ebé FFTL fó sai katak  iha tinan ne’e realiza fali kompetisaun jogu sub-15 no  sub-17, asosiasaun hotu preparadu liuliu Asosiasaun Munisípiu hodi infrenta atividade jogu hirak ne’e.

Jornalista: Marito da Costa/Editór: Vito Salvadór